ەر ادام كالاشنيكوۆ اۆتوماتىن 3 ميلليون تەڭگەگە ساتپاق بولعان. بۇل مامىلەنى قالالىق پروكۋراتۋرانىڭ كەلىسىمىمەن ۇيىمداسقان قىلمىسقا قارسى كۇرەس باسقارماسى توقتاتتى, دەپ حابارلايدى Egemen.kz Polisia.kz-كە سىلتەمە جاساپ.
– ارنايى ءىس-شارا بارىسىندا قارۋ-جاراق ساتۋمەن اينالىستى دەگەن كۇدىكپەن 42 جاستاعى ا. ەسىمدى ازامات ۇستالدى. ول 5,6 مم پاترونداردى, اتۋعا جارامدى اك-74 اۆتوماتىن ساتتى. قارۋ-جاراقتىڭ ءنومىرى جويىلعان, بۇل ونى انىقتاۋدى قيىنداتۋ ءۇشىن ادەيى جاسالدى دەپ ويلايمىز. قازىرگى ۋاقىتتا قر قك-ءنىڭ 287-بابى 4-بولىگىمەن سوتقا دەيىنگى تەرگەۋدىڭ بىرىڭعاي تىزىلىمىنە تىركەلگەن قىلمىستىق ءىس اياسىندا سوت-بالليستيكالىق ساراپتاما تاعايىندالىپ, ونىڭ قورىتىندىسى بويىنشا اتىس قارۋىنىڭ قايدان الىنعاندىعى جانە كىمدىكى ەكەندىگى انىقتالاتىن بولادى, – دەدى ۇيىمداسقان قىلمىسقا قارسى كۇرەس باسقارماسىنىڭ باسشىسى جانات نۇرعاليەۆ.
كۇدىكتى ءوز ءىسىن مويىندادى. ول ۋاقىتشا ۇستاۋ يزولياتورىنا قامالدى.