سولتۇستىك قازاقستان وبلىسىندا 10 اۋىلدىق مەكتەپ اپاتتى جاعدايدا تۇر, دەپ حابارلايدى Egemen.kz.
ءبىلىم بەرۋ دەپارتامەنتىنىڭ حابارلاۋىنشا, ايىرتاۋ اۋدانىنىڭ نوۆوسۆەتلوۆ جانە كوماروۆسكايا ورتا مەكتەپتەرى, م.جۇماباەۆ اۋداندىق مەكتەبى, كىشكەنەكول قازاق مەكتەپ-گيمنازياسى, ءۋاليحانوۆ اۋدانىنىڭ قىزىلتۇس ورتا مەكتەبى, كيەۆ, قاراشى, بوستاندىق, نوۆوسۆەتلوۆسكايا مەكتەپتەرى شۇعىل جوندەۋ جۇمىستارىن تالاپ ەتەدى.
«رەسپۋبليكالىق ءبىلىم بەرۋ دەرەكتەر بازاسىنا سايكەس, 472 مەكتەپتىڭ 85-ءى بەيىمدەلگەن ءۇي-جايلاردا ورنالاسقان - 18%, 387 مەكتەپ كىرپىشتەن سالىنعان, اققايىڭ اۋدانىنداعى تۇمەن مەكتەبىنىڭ عيماراتى قامىستان سالىنعان, ءۇش باستاۋىش مەكتەپ اعاش عيماراتتاردا ورنالاسقان. پەتروپاۆل قالاسىنداعى ەكى مەكتەپ 1936 جىلى سالىنعان عيماراتتاردا ورنالاسقان. جالپى وبلىس بويىنشا 1930-1979 جىلدار ارالىعىندا 271 مەكتەپ, ياعني 58 پايىزى سالىنعان. ەكى-ءۇش قاباتتى ۇيلەردىڭ ءبىر بولىگىن عانا الىپ جاتقان مەكتەپتەر بار. وسىعان وراي, جەرگىلىكتى اتقارۋشى ورگانداردىڭ كەزەك كۇتتىرمەيتىن مىندەتى – وقۋ عيماراتتارىنىڭ تەحنيكالىق جاعدايىن قاداعالاۋ جانە اپاتتى جاعدايلاردىڭ الدىن الۋ», دەدى ۆەدومستۆودان.
تايىنشى اۋدانىنداعى ءۇش مەكتەپ اپاتتى جاعدايدا تۇر. تايىنشى اۋدان ورتالىعىندا جانە ۆيشنەۆكا اۋىلىندا ەكى جاڭا قۇرىلىس باستالدى. دراگوميروۆكا اۋىلىنداعى جاڭا مەكتەپتىڭ قۇرىلىسى ءۇشىن جوبالىق-سمەتالىق قۇجاتتاما جاسالۋدا.