بۇل تۋرالى قىرعىزستاننىڭ ۇلتتىق قاۋىپسىزدىك مەملەكەتتىك كوميتەتىنىڭ شەكارا قىزمەتى حابارلادى, دەپ جازادى Egemen.kz 24.kg سايتىنا سىلتەمە جاساپ.
جاۋاپتى مينيسترلىكتىڭ مالىمەتىنشە, وقيعا 14 قىركۇيەكتە باتكەن وبلىسىنىڭ بۇلاق-باشى اۋدانىندا بولعان. ۆەدومستۆو مالىمەتىندە تاجىكستاننىڭ اسكەري قىزمەتشىلەرى تاراپتار اراسىنداعى كەلىسىمدەردى بۇزا وتىرىپ, مەملەكەتتىك شەكارانىڭ بەلگىلەنبەگەن ۋچاسكەسىندە جاۋىنگەرلىك پوزيتسيالارعا شىققانى تۋرالى ايتىلعان.
«قىرعىز تاراپىنىڭ اۋماقتان شىعۋ تۋرالى تالاپتارىن ەلەمەي, تاجىك شەكاراشىلارى وق جاۋدىردى. بۇعان جاۋاپ رەتىندە قىرعىز رەسپۋبليكاسىنىڭ شەكاراشىلارى دا قارۋ قولدانعان. اتىس باستالىپ, ونىڭ بارىسىندا تاجىك تاراپى مينومەت قولداندى. ساعات 9:30-داعى جاعداي بويىنشا دۇركىن-دۇركىن اتىس بولىپ جاتىر. الدىن الا مالىمەت بويىنشا, قىرعىز تاراپىنان قۇرباندار مەن زارداپ شەككەندەر جوق. وقيعا ورنىنا باتكەن شەكارا وتريادىنىڭ باستىعى اتتاندى. شەكارا قىزمەتىنىڭ باتكەن وبلىستىق باسقارماسىنىڭ باستىعى, پولكوۆنيك قيالبەك تولەنباەۆ پەن تاجىكستان رەسپۋبليكاسى شەكارا اسكەرلەرىنىڭ سوعدى وبلىستىق باسقارماسىنىڭ باستىعى, گەنەرال-مايور ح.پيراكزودا قاقتىعىستىڭ ورشۋىنە جول بەرمەۋ ماقساتىندا تەلەفون ارقىلى سويلەستى. تاراپتار كەزدەسۋدى جوسپارلاپ وتىر», دەپ جازىلعان ۆەدومستۆو حابارلاماسىندا.