قازاقستاننىڭ عىلىمي-زەرتتەۋ ينستيتۋتتارى مەن جوعارى وقۋ ورىندارىندا 22 مىڭ عالىم جۇمىس ىستەيدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى, دەپ حابارلايدى Egemen.kz.
ءمينيستردىڭ ايتۋىنشا, ۆەدومستۆو ءبىرىنشى كەزەكتە مەملەكەت باسشىسىنىڭ تاپسىرمالارىن ورىنداۋ بويىنشا جۇمىس ىستەيدى. عىلىم اكادەمياسىنا مەملەكەتتىك مارتەبە بەرۋ جۇمىستارى جۇرگىزىلۋدە.
«قازىر ۇكىمەت جانىنان ارنايى جۇمىس توبى قۇرىلىپ, مەملەكەتتىك مارتەبە بەرۋ, زاڭناماعا وزگەرىستەر مەن تولىقتىرۋلار ەنگىزۋ, ۇلتتىق عىلىم اكادەمياسىن قارجىلاندىرۋ, سونداي-اق ۇلتتىق عىلىم اكادەمياسىنا جاڭا وكىلەتتىكتەر بەرۋ بويىنشا ۇسىنىستار ازىرلەۋ پروتسەسى ءجۇرىپ جاتىر», دەدى س. نۇربەك «عىلىم جانە جوعارى ءبىلىم-2022» فورۋمىندا.
ءمينيستردىڭ ايتۋىنشا, قازىر ۋنيۆەرسيتەت عىلىمىن دامىتۋ مىندەتى ءبىرىنشى كەزەكتە تۇر.
«بۇگىن ءبىز بارلىق عىلىمي-زەرتتەۋ ينستيتۋتتارىنىڭ رەكتورلارىمەن جانە ديرەكتورلارىمەن بىرگە ۋنيۆەرسيتەت عىلىمى مەن ىرگەلى, قولدانبالى عىلىم اراسىنداعى بايلانىستى قالاي تابۋعا بولاتىنىن ويلاستىرعان ءبىرىنشى فورسايت سەسسياسىنا قاتىسىپ جاتىرمىز. ۋنيۆەرسيتەتتەر عىلىمي كادرلاردىڭ قاينار كوزىنە اينالۋى ءتيىس», دەدى مينيستر.
بۇدان سوڭ, ۆەدومستۆو باسشىسى ەلىمىزدەگى عىلىمي كادرلاردىڭ جەتىسپەۋشىلىگىنە توقتالدى.
«قازىر بىزدە عىلىمي كادرلار تاپشى. تاۋەلسىزدىكتىڭ باسىندا 52 مىڭعا جۋىق عالىم بولسا, 2000 جىلداردىڭ باسىندا 35 مىڭعا جۋىق عالىمنان ايىرىلدىق. قازىر عىلىمي-زەرتتەۋ ينستيتۋتتارى مەن ۋنيۆەرسيتەتتەردە 22 مىڭ عىلىمي قىزمەتكەر جۇمىس ىستەيدى. ءبىزدىڭ مىندەتىمىز – جاستاردى قولدانبالى جانە ىرگەلى عىلىمعا تارتۋ», دەپ اتاپ ءوتتى ساياسات نۇربەك.