الماتىدا جىل باسىنان بەرى 1560 ينتەرنەت-الاياقتىق فاكتىسى تىركەلگەن. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە الماتى قالالىق كريمينالدىق پوليتسيا باسقارماسىنىڭ باستىعى قۋاتبەك ناۋاتوۆ ءمالىم ەتتى, دەپ حابارلايدى Egemen.kz.
«جىل باسىنان بەرى الماتى اۋماعىندا 1560 ينتەرنەت-الاياقتىق تىركەلگەن. ەگەر وتكەن جىلدىڭ سايكەس كەزەڭىمەن سالىستىراتىن بولساق, قىلمىس سانى 34,6%-عا تومەندەدى. 2022 جىلدىڭ 7 ايىندا قىلمىستاردى اشۋ پايىزى 30%-دان استى», دەدى قۋاتبەك ناۋاتوۆ.
سپيكەردىڭ سوزىنشە, ينتەرنەت سالاسىنداعى قىلمىستار سانىنىڭ ازايۋىنا ءتارتىپ ساقشىلارى جۇرگىزەتىن پروفيلاكتيكالىق جۇمىس اسەر ەتتى.
«ۆەدومستۆونىڭ جەدەل قىزمەتكەرلەرى مەن ءباسپاسوز قىزمەتى حابارلامالاردى تاراتادى, الاياقتاردىڭ قىلمىستىق سىزبالارى تۋرالى باياندايتىن بەينەروليكتەر دايىندايدى. سونىمەن قاتار, اقپارات ورتالىق كوشەلەر مەن كينوتەاترلاردىڭ ەلەكتروندى بيلبوردتارىندا ورنالاستىرىلدى», دەيدى ول.
قۋاتبەك ناۋاتوۆ ازاماتتاردى قىراعى بولۋعا جانە نەگىزگى ساقتىق شارالارىن ۇستانۋعا شاقىردى. مىسالى, بەيتانىس ادامداردىڭ ءوتىنىشى بويىنشا Anydesk جانە Teamviewer سىندى قاشىقتان كىرۋ باعدارلامالارىن ورناتپاۋ كەرەك. بۇل باعدارلامالار الاياقتارعا تەلەفون كىتاپشاسىنا, ءموبيلدى بانكتەرگە جانە گادجەتتىڭ جادىندا ساقتالعان باسقا جەكە مالىمەتتەرگە تولىق قول جەتكىزۋگە مۇمكىندىك بەرەدى.