وسى جىلدىڭ بەس ايىندا قازاقستاننىڭ سىرتقى تاۋار اينىلىمى 51,3 ملرد دوللارعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 40,7 پايىزعا ارتىق, دەپ حابارلايدى Egemen.kz ساۋدا جانە ينتەگراتسيا مينيسترلىگىنە سىلتەمە جاساپ.
ۆەدومستۆو مالىمەتىنشە, قاڭتار-مامىر ارالىعىندا ەلىمىزدىڭ ەكسپورت كولەمى 59,1% پايىزعا ءوسىپ, 34,2 ملرد دوللار بولعان. سول ۋاقىت ىشىندە شيكى مۇناي ەكسپورتى - 91,2%, فەرروقورىتپالار - 61,1%, مىس جانە كاتودتار - 25,3%, بيداي - 61,3%-عا ارتقان. اتالعان تاۋارلار اسىرەسە يتاليا (5759,4 ملن دوللار), قىتاي (5114,7 ملن دوللار) جانە رەسەيگە (2668,7 ملن دوللار) كوپ ەكسپورتتالعان.
ايتا كەتسەك, بەس ايداعى يمپورت كولەمى دە 14,4 پايىزعا ءوسىپ, 17,1 ملرد دوللارعا جەتتى. ونىڭ باسىم بولىگى دارىلىك زاتتار, مىس كەندەرى مەن كونتسەنتراتتارى جانە قارا مەتالداردان جاسالعان وزگە دە بۇيىمدار.