بۇگىن سولتۇستىك قازاقستان وبلىسىنىڭ قۇرمەتتى ازاماتى, مايدانگەر, ولكەتانۋشى ءارى جازۋشى سەرگەي پرەسنياكوۆ 100 جاسقا كەلدى, دەپ حابارلايدى Egemen.kz.
ەكىنشى دۇنيەجۇزىلىك سوعىستىڭ ارداگەرى سەرگەي پرەسنياكوۆتىڭ مەرەيتويىنا وراي سالتاناتتى جيىن ءوتتى.
سقو اكىمى قۇمار اقساقالوۆ مەملەكەت باسشىسى مايدانگەرگە ارنايى جولداعان العىس حاتىن وقىپ, توسبەلگىسىن تابىستادى.
«سەرگەي ءميحايلوۆيچتىڭ ەسىمى سولتۇستىك قازاقستان وبلىسىنىڭ تاريحىنا التىن ارىپتەرمەن جازىلعان. سەرگەي پرەسنياكوۆ – ءبىزدىڭ ەل تاريحىنداعى كوپتەگەن وقيعالاردىڭ كۋاگەرى جانە قاتىسۋشىسى. ول ماسكەۋ تۇبىندەگى شايقاستاردا سوعىسىپ, 38 اتقىشتار بريگاداسىندا قىزمەت ەتتى. سوعىستان كەيىن پارتيا ورگاندارىندا جۇمىس ىستەدى, ارداگەرلەر ۇيىمىن باسقاردى. ءومىرىنىڭ كوپ بولىگىن ءبىزدىڭ ايماقتىڭ تاريحىن زەرتتەۋگە ارنادى. سولتۇستىك قازاقستان ولكەتانۋىنىڭ دامۋىنا باعا جەتپەس ۇلەس قوستى. ستۋدەنتتەرگە ولكەتانۋ جانە تۋعان ولكە تاريحى كۋرستارىنان ساباق بەردى. ونىڭ اۆتورلىعىمەن جازىلعان كىتاپتار ارقىلى وقىرمان ەل تاريحىنان حاباردار بولادى», دەدى وبلىس اكىمى.
سەرگەي پرەسنياكوۆ - كوپتەگەن وردەن-مەدالدىڭ يەگەرى, «قۇرمەت بەلگىسى» وردەنىن قاتارىنان 4 رەت العان باتىر.
ول ءوزىنىڭ ەڭبەك جولىن 1939 جىلى ومبى تەمىرجولى پەتروپاۆل ستانساسىندا ەكونوميست بولىپ باستاعان. بىراق قاھارلى سوعىس باستالىپ, 19 جاسار سەرگەي پرەسنياكوۆ مايدانعا اتتانۋعا بەل بۋادى.
وسىلايشا, ول باتىس, سولتۇستىك-باتىس مايداندارى مەن ماسكەۋ تۇبىندەگى شايقاستارعا قاتىسادى.
سوعىستان كەيىن ءارتۇرلى سالادا جۇمىس ىستەگەن, 10-نان استام كىتاپتىڭ اۆتورى.
ايتا كەتسەك, ول 1980-ءشى جىلدارى سقو ارداگەرلەر كەڭەسىنىڭ توراعاسى بولىپ, پەتروپاۆلدا جەڭىس ساياباعىن اشقان ەدى.