قازاقستاندا ەلەكتر ساموكات ءۇشىن ۇلتتىق ستاندارت ازىرلەنىپ جاتىر. بۇل تۋرالى قازاقستان ستاندارتتاۋ جانە مەترولوگيا ينستيتۋتىنىڭ كوميتەت توراعاسى ەربول سەيپىلوۆ ايتتى, دەپ جازادى Egemen.kz.
ء«بىرىنشى كەزەكتە, وسى ستاندارتتى ازىرلەۋ ۇكىمەتتىڭ تاپسىرماسى بويىنشا ىشكى ىستەر مينيسترلىگىنىڭ باستاماسىمەن جۇرگىزىلگەنىن اتاپ وتكەن ءجون. وسى ستاندارت اياسىندا ءبىز ساموكاتتىڭ 25 كم/ساع دەيىنگى ماكسيمالدى جىلدامدىعىن, سونداي-اق جاياۋ جۇرگىنشىلەر رەجيمىنىڭ مۇمكىندىگىن قاراستىردىق», دەدى ول قۇجاتتى تالقىلاۋ بويىنشا كەزدەسۋ بارىسىندا.
ۇلتتىق ستاندارتقا سايكەس ەلەكتر ساموكات - بۇل ورىندىعى جوق, ەلەكتر قوزعالتقىشىن پايدالانۋ ارقىلى ءبىر ادامنىڭ قوزعالۋىنا ارنالعان ەكى نەمەسە ءۇش دوڭگەلەگى بار جەكە موبيلدىلىك ەلەكتر كولىگى. ستاندارتتى ازىرلەۋشىلەر ەلەكتر ساموكاتتاردىڭ بارلىق ءتۇرى ءۇشىن ماكسيمالدى جىلدامدىقتى ەنگىزۋدى ۇسىنادى. ول ساعاتىنا 25 شاقىرىمنان اسپايدى. قازاقستاندا ساموكاتشىلاردىڭ قاتىسۋىمەن اپاتتىڭ ءجيى بولۋىنا بايلانىستى جىلدامدىق شەكتەلەدى. ىشكى ىستەر مينيسترلىگى مالىمەتىنشە, 2021 جىلى قازاقستاندا ساموكاتتاردىڭ قاتىسۋىمەن 68 اپات بولىپ, ءبىر ادام كوز جۇمعان. 71 ادام زارداپ شەكتى. بيىل ساموكاتشىلاردىڭ قاتىسۋىمەن 41 اپات بولدى. ەگەر ەرەجەلەر قابىلدانىپ, زاڭناماعا ءتيىستى تۇزەتۋلەر ەنگىزىلسە, ەلەكتر سكۋتەر وندىرۋشىلەرى كولىككە ارنالعان نۇسقاۋلىقتا جۇرگىزۋشىنىڭ سالماعى, جاسى, بويى بويىنشا نورمالاردى قاراستىرۋعا ءتيىس. ساموكاتتىڭ وزىندە تاڭبالاۋ, جارىق شاعىلىستىرعىش, فارالار بولۋى كەرەك. جىكتەۋ بويىنشا ەلەكتر ساموكاتتاردى ۆەلوسيپەدتەرگە جاتقىزۋ قاراستىرىلىپ جاتىر. ولار جول بويىمەن دە, تروتۋارمەن دە جۇرە الادى. جاياۋ جۇرگىنشىلەرگە جاقىنداعان كەزدە جىلدامدىقتى تومەندەتۋ قاجەت بولادى. «بۇل ستاندارت زاڭناماداعى نورماتيۆتىك قۇجاتتاردا, جول قوزعالىسى ەرەجەلەرىندە وسى ماسەلەنى رەتتەۋ ءۇشىن ازىرلەنۋدە. تولىق جاعدايدى ءبىز ستاندارتتىڭ ءوزىن پىسىقتاعاننان كەيىن كورەمىز. زاڭناماعا ءتيىستى وزگەرىستەر ەنگىزىلەدى», دەپ تولىقتىردى ەربول سەيپىلوۆ. ستاندارتتاردى بيىل قىركۇيەككە دەيىن ەنگىزۋ جوسپارلانىپ وتىر.