بۇل تۋرالى پرەزيدەنت جانىنداعى شەتەلدىك ينۆەستورلار كەڭەسىنىڭ 34-ءشى جالپى وتىرىسىندا مەملەكەت باسشىسى قاسىم-جومارت توقاەۆ ايتتى, دەپ حابارلايدى Egemen.kz.
«بۇگىندە گاز سالاسى كومىردى پايدالانۋ دەڭگەيىن تومەندەتۋدە ماڭىزدى ءرول وينايدى. قازاقستاننىڭ گازدانۋ دەڭگەيى 53 پايىزعا جەتتى. 10 ملن-عا جۋىق ازامات گازعا قول جەتكىزىپ وتىر. ەلدىڭ ىشىندە گازدى قولدانۋ وتە جىلدام ارتىپ كەلە جاتىر. بۇل ءبىرىنشى كەزەكتە الماتىداعى جەو-2 مەن جەو-3-ءتىڭ گازعا كوشۋىمەن, گاز-حيميا كەشەنى جانە جاڭا وندىرىستىك كاسىپورىنداردىڭ ىسكە قوسىلۋىمەن بايلانىستى. كەلەسى جىلدىڭ ىشىندە-اق ىشكى نارىقتا گاز تاپشىلىعى بولجانادى. گازبەن ىشكى تۇتىنۋدى قامتاماسىز ەتۋ ونى ەكسپورتقا شىعارۋعا قاراعاندا ءسوزسىز باسىم», دەدى مەملەكەت باسشىسى.
وسىعان وراي پرەزيدەنت ەل ۇكىمەتىنە تەڭىز كەن ورنىنىڭ اكتسيونەرلەرىمەن بىرلەسىپ, 2 ملرد تەكشە مەتر گازدى ەكسپورتتان ىشكى نارىققا كەرى باعىتتاۋ ماسەلەسىن قاراستىرۋدى تاپسىردى.
«سونىمەن قاتار ۇكىمەتكە قاشاعاندا قۋاتى 1 ملرد تەكشە مەتر بولاتىن گاز وڭدەۋ زاۋىتى قۇرىلىسى جوباسىن قارجىلاندىرۋ ماسەلەسىن شۇعىل شەشۋ تالاپ ەتىلەدى», دەدى قاسىم-جومارت توقاەۆ.
ايانا توعانبەك