بۇگىن ەلىمىزدە جالپىحالىقتىق رەفەرەندۋم باستالدى. حالىقارالىق اقپارات ورتالىعىنا قىرعىزستان ورتالىق سايلاۋ كوميسسياسىنىڭ مۇشەسى ءابدىجاپپار بەكماتوۆ كەلىپ, بريفينگ وتكىزدى, دەپ جازادى Egemen.kz.
«بارشاڭىزدى قازاقستاندا بولىپ جاتقان تاريحي ءمانى بار ساياسي وقيعانىڭ ءوتىپ جاتقانىمەن قۇتتىقتايمىن. رەفەرەندۋمنىڭ نەگىزگى ماقساتى – ەلدىڭ باستى زاڭى كونستيتۋتسياعا وزگەرىستەر ەنگىزۋ. بۇل قازاق ەلى ءۇشىن, قازاقستاندىقتار ءۇشىن ەرەكشە ماڭىزى بار ءىس-شارا. حالىقتى اقپاراتتاندىرۋ وتە جاقسى دەڭگەيدە جۇرگىزىلگەن. رەفەرەندۋم ۋچاسكەلەرىنىڭ دايىندىعى كوڭىلدەن شىقتى. بارلىعى دا جوعارى دەڭگەيدە. ساياسي شاراعا قازاقستاندىقتاردىڭ بەي-جاي قاراپ جاتپاعانىن بايقايمىز. ءبارى دە ەل ەرتەڭى جارقىن بولۋى ءۇشىن ۇلكەن بەلسەندىلىكپەن داۋىس بەرۋگە كەلىپ جاتىر», دەدى ءا.بەكماتوۆ.
سپيكەر سايلاۋشىلار ءۇشىن دە, باقىلاۋشىلار ءۇشىن دە جاقسى جاعداي جاسالعانىن اتاپ ءوتتى.
ول قىرعىزستاننان بارلىعى 15 وكىلدىڭ كەلگەنىن, ولاردىڭ قازىر نۇر-سۇلتان, الماتى قالالارىندا جانە جامبىل وبلىستارىندا جۇمىس ىستەپ جاتقانىن جەتكىزدى.
جالپى ەل بويىنشا 10 013 رەفەرەندۋم ۋچاسكەسى جۇمىس ىستەپ تۇر. ال قاتىسۋ قۇقىعى بار ازاماتتار ءتىزىمى – 11 ملن 722 مىڭ 536 ادام. سونداي-اق 52 ەلدە 65 ۋچاسكەلىك رەفەرەندۋم كوميسسياسى جۇمىس ىستەپ جاتىر.