ۇلت بىرلىگى – ۇلى بايلىق. XV وبلىستىق ۇلتتار دوستىعى فەستيۆالى جىل سايىن ءداستۇرلى تۇردە ۇيىمداستىرىلىپ كەلەدى. بيىل بۇل مادەني شارا وبلىستىق دوستىق ءۇيىنىڭ بەس جىلدىعى اياسىندا جانە وڭىردە تۇراتىن ەتنوستاردىڭ ءتىلى مەن سالت-ءداستۇرىن, جالپى قازاقستاندىق مادەنيەتتى, رۋحاني بىرلىكتى, حالىق اراسىنداعى دوستىقتى, ۇلتتىق ءتول مادەنيەتتى قالىپتاستىرۋ جانە دامىتۋ ماقساتىندا وتكىزىلدى. فەستيۆالدىڭ ۇيىمداستىرۋشىسى جانە قۇرىلتايشىسى وبلىستىق قازاقستان حالقى اسسامبلەياسى حاتشىلىعى, وبلىستىق مادەنيەت, مۇراعاتتار جانە قۇجاتتاما باسقارماسى, وبلىستىق دوستىق ءۇيى بولىپ تابىلادى.
ون بەسىنشى رەت وتكىزىلىپ وتىرعان فەستيۆالدە وبلىستىق قازاقستان حالقى اسسامبلەياسىنىڭ 19 ەتنومادەني بىرلەستىگى دايىنداعان شىعارماشىلىق باعدارلاما ۇسىنىلدى. سونىمەن قاتار, فەستيۆالعا حرومتاۋ قالاسىنىڭ كەنشىلەر مادەنيەت ءۇيى جانە ايتەكە بي اۋدانىنداعى ت.شەۆچەنكو اتىنداعى قارابۇتاق ورتا مەكتەبىنىڭ شىعارماشىلىق ۇجىمدارىنىڭ قاتىسۋى دا فەستيۆالدىڭ كوكجيەگى كەڭەيىپ كەلە جاتقانىن كورسەتتى. ءار ۇجىمنىڭ باعدارلاماسى بەرىلگەن تاقىرىپقا ساي, شىعارماشىلىق مۇمكىندىگىنە قاراي حالىقتىڭ ۇلتتىق كولوريتىنەن جانە ءجون-جورالعىلارىنان تۇراتىن تەاترلاندىرىلعان تولىق كومپوزيتسيا تۇرىندە ورىندالدى.
فەستيۆالدىڭ ماقساتى جەكە ورىنداۋشىلاردى جانە شىعارماشىلىق ۇجىمدارداعى تالانتتى جاستاردى قولداۋ جانە دامىتۋ بولىپ تابىلادى.
شارانىڭ العاشقى كۇنى وبلىستاعى 19 ەتنومادەني بىرلەستىكتىڭ ۇلتتىق قولدانبالى ونەر كورمەسى ۇيىمداستىرىلدى. كورمەنى وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى ءنازيرا تابىلدينوۆا قىسقاشا ءسوز سويلەپ اشىپ, فەستيۆال قاتىسۋشىلارىن ونەر مەرەكەسىمەن قۇتتىقتادى. ول كورمەنى ۇيىمداستىرۋ ارقىلى وبلىستى مەكەندەگەن ۇلتتاردىڭ قولدانبالى ونەرىن ناسيحاتتاۋ, تانىمدىق تاعىلىمىنا قول جەتكىزۋ, جاستاردى ونەردى سۇيۋگە تاربيەلەۋ مۇمكىندىگى مولايىپ وتىرعانىن جەتكىزدى.
فەستيۆال بارىسىندا وعان قاتىسۋشىلار ءوز ۇلتىنىڭ ونەرلەرىن ورتاعا سالدى. دوستىق ءۇيىنىڭ ساحناسىنان ءان قالىقتاپ, حالىقتىق بيلەردىڭ اسەم قيمىلى توگىلدى. ءار ۇلتتىڭ كوركەمونەرپازدارى دوستىق پەن بىرلىكتىڭ بىرەگەي ىقىلاس-نيەتىنەن ارنا تارتقان باسقا دا ونەرلەرىن كورەرمەن نازارىنا ۇسىندى. بۇل جولى جاستاردىڭ ونەرگە دەگەن ىنتاسى ارتقانى, كوپشىلىك مادەني شارالارعا قاتىسۋعا نيەتتى ەكەندىكتەرى ايقىن اڭعارىلىپ تۇردى. بۇل فەستيۆالدىڭ قىزىقتى وتۋىنە ىقپال ەتتى. ولاردىڭ اراسىندا قاي ساحنانىڭ دا اجارىن كەلتىرەتىن انشىلەر مەن بيشىلەر ءوسىپ كەلە جاتقانى قۋانتادى. ەڭ باستىسى, بۇل فەستيۆال دوستىقتىڭ ءتىنىن بەكىتەتىن شارا رەتىندە باعالى. سوندىقتان دا مۇندا ونەرلەرىن كورسەتۋگە ىنتالىلار كوپ بولدى.
فەستيۆالدە ونەرلەرىمەن كوزگە ءتۇسىپ, كورەرمەننىڭ كوڭىلىنەن شىققان ونەرپازدار 1 مامىر – قازاقستان حالقىنىڭ بىرلىگى كۇنى مەرەكەسىندە تۇڭعىش پرەزيدەنت ن.نازارباەۆ اتىنداعى ساياباقتا وتەتىن گالا-كونتسەرتكە قاتىساتىن بولدى. وبلىستىق مادەنيەت, مۇراعاتتار جانە قۇجاتتاما باسقارماسى باسشىسىنىڭ ورىنباسارى قىدىرعالي ەرمۇقان مەن وبلىستىق دوستىق ءۇيىنىڭ ديرەكتورى روزا بەركەشەۆا بارلىق فەستيۆالعا قاتىسۋشىلارعا ونەرلەرىڭ ورگە ءجۇزسىن دەگەن تىلەك ءبىلدىرىپ, العىس حاتتارمەن جانە ەستەلىك سىيلىقتارمەن ماراپاتتادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.