ۇكىمەت باسشىسى بەردىبەك ساپارباەۆقا العىس ايتتى

ۇكىمەت باسشىسى ءماسليحات دەپۋتاتتارىنا جامبىل وبلىسىنىڭ اكىمى لاۋازىمىنا نۇرجان نۇرجىگىتوۆتى تاعايىنداۋ تۋرالى قازاقستان رەسپۋبليكاسى پرەزيدەنتىنىڭ ۇسىنىس-حاتىن وقىپ بەردى. دەپۋتاتتار ۇسىنىلعان كانديداتۋرانى ءبىراۋىزدان ماقۇلدادى. 

وبلىس اكتيۆىمەن وتكەن كەزدەسۋدە قر پرەمەر-ءمينيسترى بەردىبەك ساپارباەۆتىڭ وبلىستىڭ دامۋىنا, ۇلتارالىق كەلىسىمدى نىعايتۋعا, حالىقتىڭ ءال-اۋقاتى مەن تۇرمىس ساپاسىن ارتتىرۋعا قوسقان ۇلەسىنە توقتالىپ, ءوڭىر باسشىسى قىزمەتىندە اتقارعان جۇمىسى ءۇشىن العىس ايتتى. 

«بەردىبەك ماشبەك ۇلى ەكى جىلدان استام ۋاقىت ىشىندە بىرقاتار ماڭىزدى جوبالاردى ىسكە اسىرىپ, جامبىل وبلىسى الەۋمەتتىك-ەكونوميكالىق دامۋ كورسەتكىشتەرى بويىنشا جاقسى ناتيجەلەرگە قول جەتكىزدى. بەردىبەك ساپارباەۆ مەملەكەتىمىزدىڭ ىرگەتاسىن قالاعان تۇلعالاردىڭ ءبىرى. حالىققا قىزمەت ەتۋدىڭ شىنايى ۇلگىسىن كورسەتكەن سىيلى ازامات. مەملەكەت باسشىسىنىڭ جانە جەكە ءوزىمنىڭ اتىمنان سىزگە كوپجىلدىق قاجىرلى ەڭبەگىڭىز ءۇشىن زور العىسىمدى بىلدىرەمىن!» دەدى ءا. سمايىلوۆ. 

وبلىستىڭ جاڭا اكىمىن تانىستىرۋ بارىسىندا ءاليحان سمايىلوۆ نۇرجان نۇرجىگىتوۆتىڭ جاۋاپتى باسشىلىق لاۋازىمداردا اتقارعان ۇلكەن جۇمىس تاجىريبەسىن اتاپ ءوتتى. 

ۇكىمەت باسشىسى ءوڭىر باسشىلىعى الدىنا جاڭا قازاقستاندى قۇرۋ ستراتەگياسىن ىسكە اسىرۋ اياسىنداعى مىندەتتەردى بەلگىلەپ, حالىقتىڭ الەۋمەتتىك-ەكونوميكالىق ماسەلەلەرىن جەدەل شەشۋدىڭ ماڭىزدىلىعىنا توقتالدى. 

«مەملەكەت باسشىسىنىڭ قازاقستان حالقىنا ارناعان جولداۋىندا العا قويىلعان مىندەتتەردى, اسىرەسە, ەل تۇرعىندارىنىڭ ءال-اۋقاتىن ارتتىرۋ باعىتىن ورىنداۋ بويىنشا بەلسەندى جۇمىس اتقارۋ قاجەت. سونىمەن قاتار وبلىستىڭ ونەركاسىپ, اۋىل شارۋاشىلىعى سالالارىن ودان ءارى دامىتىپ, جاڭا جۇمىس ورىندارىن قۇرۋ, شاعىن جانە ورتا بيزنەستى قولداۋ, ينۆەستيتسيا تارتۋ بويىنشا اۋقىمدى جۇمىستاردى ساپالى ۇيىمداستىرۋ قاجەت. وبلىستا ءبىراز جينالعان ماسەلە بارىن جاقسى بىلەمىز. جاڭا وبلىس باسشىلىعى ۇكىمەتكە ولاردى رەتتەۋ بويىنشا ءتيىستى ۇسىنىستار ەنگىزۋى كەرەك. نۇرجان مولديار ۇلى ءوڭىر الدىندا تۇرعان بارلىق تاپسىرمانى وبلىس اكتيۆىمەن بىرلەسە وتىرىپ, ساپالى اقتارادى دەپ سەنىم بىلدىرەمىز»,  دەدى قر پرەمەر-ءمينيسترى.