دۇنيەجۇزىلىك ازاماتتىق قورعانىس كۇنى اياسىندا ەرتەڭ, 1 ناۋرىز كۇنى ساعات 09:00-دەن 12:00-گە دەيىن قازاقستان رەسپۋبليكاسى بويىنشا ازاماتتىق قورعاۋدىڭ قۇلاقتاندىرۋ جۇيەسىن تەكسەرۋ جوسپارلانعان. بۇل تۋرالى قر توتەنشە جاعدايلار مينيسترلىگى حابارلادى, دەپ جازادى Egemen.kz.
«وسىعان بايلانىستى قازاقستان رەسپۋبليكاسىنىڭ بارلىق ازاماتتارىنا قۇلاقتاندىرۋ جۇيەسىن تەكسەرۋدىڭ الەمدە بولىپ جاتقان گەوساياسي جاعدايعا قاتىسى جوق ەكەنىن حابارلايمىز. بۇل تابيعي جانە تەحنوگەندىك سيپاتتاعى توتەنشە جاعدايلار تۋىنداعان جاعدايدا ەل ازاماتتارىنىڭ قاۋىپسىزدىگىن قامتاماسىز ەتۋ ماقساتىنداعى جىل سايىنعى ءىس-شارا», دەپ ءتۇسىندىردى قر تجم اقپاراتتاندىرۋ, تسيفرلاندىرۋ جانە بايلانىس دەپارتامەنتى.
سونداي-اق ءبولىم ازاماتتاردى دىبىستىق سيگنال كەزىندە سابىر ساقتاۋعا شاقىردى.
«سونىمەن قاتار قاۋىپتى وندىرىستىك وبەكتىلەر مەن گيدروتەحنيكالىق قۇرىلىستارداعى جەرگىلىكتى قۇلاقتاندىرۋ جۇيەلەرىنىڭ جارامدىلىعى تەكسەرىلەتىن بولادى», دەپ قوستى دەپارتامەنت.