ەلوردادا ونلاين فورماتتا «اسسامبلەيا جاستارىنىڭ» ءماجىلىسى ءوتتى. شاراعا قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ, «اسسامبلەيا جاستارى» قوعامدىق بىرلەستىگىنىڭ توراعاسى تيمۋر جۇمىرباەۆ, مەملەكەتتىك ورگاندار مەن رەسپۋبليكالىق جاستار ۇيىمدارىنىڭ وكىلدەرى قاتىستى.
«بۇگىن ءبىز اسسامبلەيا جاستارىمەن, جاستار ۇيىمدارىنىڭ جانە بىرلەستىكتەرىنىڭ وكىلدەرىمەن ولاردىڭ جۇمىسىنداعى وزەكتى ماسەلەلەردى تالقىلاۋ ءۇشىن كەزدەسىپ وتىرمىز. قازىرگى تاڭدا جاستار ۇيىمى قابىلداعان شارالاردىڭ تيىمدىلىگى مەن ناتيجەلى بولۋى جاستار باستاماسىن دامىتۋدىڭ ولشەمىنە اينالىپ وتىر. وتكەن ايدا بولعان وقيعالار جاستاردىڭ قۇقىقتىق جانە قارجىلىق ساۋاتتىلىعىن, الەۋەتىن ارتتىرۋ قاجەت ەكەنىن كورسەتتى», دەدى مارات ءازىلحانوۆ.
تيمۋر جۇمىرباەۆ «اسسامبلەيا جاستارى» ۇيىمىنىڭ باستى باعىتى جونىندە ايتىپ بەردى. «ۇيىمنىڭ ماقساتى – جاستاردى قوعامدىق كەلىسىم نەگىزىندە توپتاستىرۋ, جاستاردىڭ باستامالارىن دامىتۋ جانە الەۋمەتتىك تۇرعىدا قولداۋ. بۇگىندە ءبىز الدىمىزعا جاستارعا ناقتى كومەك بەرۋ جونىندە ماقسات قويىپ وتىرمىز. بۇگىندە 14 وبلىس پەن رەسپۋبليكالىق ماڭىزى بار ءۇش قالادا وكىلدىگىمىز بار. ۋاقىت وتە كەلە مونوقالالارعا, اۋىلدى ەلدى مەكەندەرگە شىعامىز. قازىر شاعىن قالالاردا جاستارمەن جۇمىس جاقسى جولعا قويىلعان», دەدى ول.