الماتىدا قازا تاپقان اسكەريلەر مەن پوليتسەيلەردىڭ قۇرمەتىنە ەسكەرتكىش ورناتىلادى. بۇل تۋرالى قارۋلى كۇشتەردىڭ وفيتسەرى ساندىبەك حايروۆپەن قوشتاسۋ راسىمىندە قالا اكىمى باقىتجان ساعىنتاەۆ ايتتى, دەپ حابارلايدى Egemen.kz.
ەسكە سالايىق, 35-گۆارديالىق دەسانتتىق-شابۋىل بريگاداسى كومانديرىنىڭ ورىنباسارى پودپولكوۆنيك ساندىبەك حايروۆ اكىمدىك عيماراتىن كۇزەتىپ ءجۇرىپ قازا تاپقان بولاتىن. ول شابۋىل جاسالعان عيماراتتان اسكەريلەردى شىعارىپ ۇلگەرگەن, بىراق ءوزى قاشىپ قۇتىلا الماعان.
الماتى اكىمى باقىتجان ساعىنتاەۆ مارقۇمنىڭ تۋىستارى مەن جاقىندارىنا كوڭىل ايتتى.
«قازا تاپقان اسكەري قىزمەتشىلەردى, قۇقىق قورعاۋ ورگاندارى قىزمەتكەرلەرىنىڭ قۇرمەتىنە قويىلاتىن ەسكەرتكىش رەسپۋبليكا الاڭىندا ماڭگى ساقتالادى. بۇل ءبىزدىڭ ەلىمىزدى لاڭكەستەردەن قورعاپ, بەيبىتشىلىكتى ساقتاپ, ازاماتتاردىڭ قاۋىپسىزدىگىن قامتاماسىز ەتكەندەردى ەسكە الۋ ءۇشىن ۇرپاقتارعا ارنالادى», دەدى ساعىنتاەۆ.
سونداي-اق حايروۆتىڭ وتباسىنا ماتەريالدىق كومەك كورسەتىلەتىنىن, پاتەر بولىنەتىنىن ايتتى. مارقۇمنىڭ ارتىندا ايەلى مەن ەكى بالاسى قالدى.