اقتوبە قالاسىندا كومەندانتتىق ساعات تارتىبىنە باعىنعىسى كەلمەيتىندەردىڭ سانى ازايار ەمەس. وتكەن ءتۇنى 83 تۇرعىن تارتىپكە باس يگىسى كەلمەي, اكىمشىلىك جاۋاپكەرشىلىككە تارتىلدى, دەپ حابارلايدى Egemen.kz.
قۇقىق قورعاۋ ورگاندارىنىڭ قىزمەتكەرلەرى قوعامدىق ءتارتىپتى جانە ازاماتتاردىڭ قاۋىپسىزدىگىن قامتاماسىز ەتۋ ءۇشىن كۇشەيتىلگەن رەجيمدە جۇمىس ىستەۋدە. وبلىستاعى جاعداي پوليتسيا قىزمەتكەرلەرىنىڭ تولىق باقىلاۋىندا.
«وتكەن ءتۇنى كومەندانتتىق ساعات ءتارتىبىن بۇزعانى ءۇشىن پوليتسيا بولىمدەرىنە 115 ازامات جەتكىزىلدى. ونىڭ ىشىندە 83 ادام اكىمشىلىك جاۋاپكەرشىلىككە تارتىلدى (30-ى قاماۋعا الىندى, 9-ىنا ايىپپۇل سالىندى, 20-ىنا ەسكەرتۋ بەرىلدى). سونىمەن قاتار قازىرگى ۋاقىتتا 3 ادام قاماۋدا وتىر. تاعى 4 ادامعا قاتىستى بۇلتارتپاۋ شاراسى قاراستىرىلىپ, سوتقا دەيىن تەرگەۋ جالعاسىپ جاتىر», - دەدى وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.
اقتوبە قالاسىنىڭ جانە اۋدان ورتالىقتارىنىڭ شىعا بەرىسىندە 10 بلوكبەكەت ورناتىلعان. وندا پوليتسيا قىزمەتكەرلەرى مەن اسكەريلەر قۇجاتتار مەن كولىك ءىشىن تەكسەرەدى. «10 قاڭتار كۇنى بلوك بەكەتتە 40 جاستاعى جۇرگىزۋشىنىڭ باسقارۋىنداعى «ۆاز-2140» اۆتوكولىگى توقتاتىلدى. جۇرگىزۋشىنىڭ تانىسىنىڭ قولىندا 12 كاليبرلى تەگىس ۇڭعىلى ەكى مىلتىق بولعان. قارۋ يەسى اكىمشىلىك جاۋاپقا تارتىلدى», دەدى ەربولات سارقۇلوۆ