پەتروپاۆلدا ەسىرتكى قىلمىسىنا قارسى ءىس-قيمىل دەپارتامەنتى مەن سولتۇستىك قازاقستان وبلىسى پوليتسيا دەپارتامەنتىنىڭ قىزمەتكەرلەرى سينتەتيكالىق ەسىرتكىنى وتكىزۋشىلەردى ۇستاۋ بويىنشا ارنايى وپەراتسيا جۇرگىزدى. ناتيجەسىندە ءۇش جاس جىگىت قىلمىستىق جاۋاپكەرشىلىككە تارتىلدى, دەپ حابارلايدى Egemen.kz.
ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى ەرلان وماربەكوۆ اتاپ وتكەندەي, قىلمىستىق توپ بىرلەسكەن ارەكەتتەر ناتيجەسىندە ۇستالدى. بارلىق ۇستالعاندار پەتروپاۆل قالاسىندا جالعا الىنعان پاتەردە ەكى ايدان استام تۇرىپ, «جاسىرۋ» ارقىلى سينتەتيكالىق ەسىرتكى تاراتقان.
جالداپ الىنعان پاتەردە ءتىنتۋ جۇرگىزۋ بارىسىندا قىلمىستىق ارەكەتتى كورسەتەتىن ايعاق زاتتار جانە 800 گراممعا جۋىق «مەفەدرون» سينتەتيكالىق ەسىرتكى تاركىلەندى.
ۇستالعانداردىڭ ايتۋىنشا, ولار پەتروپاۆلعا ەلىمىزدىڭ ءار وڭىرىنەن ەسىرتكىنى تاراتۋ ماقساتىندا ادەيى كەلگەن. ەرلان وماربەكوۆ ايتقانداي, ۇستالعاندارعا قاتىستى سوت قاۋلىسىمەن «قاماۋدا ۇستاۋ» بۇلتارتپاۋ شاراسى تاڭدالدى.
قىلمىستىق كودەكستىڭ 297-بابى «وتكىزۋ ماقساتىندا ەسىرتكىنى زاڭسىز يەمدەنۋ, ساقتاۋ, تاسىمالداۋ نەمەسە وتكىزۋ» بويىنشا سوتقا دەيىنگى ءىس جۇرگىزۋ باستالدى. كۇدىكتىلەردىڭ وسىعان ۇقساس بۇرىن اشىلماعان قىلمىستارعا قاتىسى بار-جوعىن انىقتاۋ بويىنشا ءىس-شارالار جۇرگىزىلۋدە.