قر پرەمەر-ءمينيسترىنىڭ ورىنباسارى ەرالى توعجانوۆ قر پارلامەنتى ءماجىلىس وكىلدەرىنىڭ دەپۋتاتتىق ساۋالىنا بەرگەن جاۋابىندا جوعارى وقۋ ورىندارىن ءتورت ساناتقا جىكتەۋ نە ءۇشىن قاجەت ەكەنىن ءتۇسىندىردى, دەپ حابارلايدى Egemen.kz.
«اشىقتىقتى قامتاماسىز ەتۋ ءۇشىن جوعارى وقۋ ورىندارىن توپتارعا ءبولۋ تەتىگى جوعارى وقۋ ورىندارىنىڭ وتىنىمدەرى ورنالاستىرىلاتىن ارنايى اقپاراتتىق پلاتفورما ارقىلى جۇزەگە اسىرىلادى. وتىنىمدەر كەلىپ تۇسكەننەن كەيىن جۇمىس توبى ءتيىستى ساراپتاما جۇرگىزەدى.
سونىمەن قاتار, زاڭ جوباسىندا جوعارى وقۋ ورىندارىن توپتارعا جىكتەۋ ەرەجەلەرى مەن كريتەريلەرىن ازىرلەۋ جانە بەكىتۋ نورماسى قاراستىرىلعان», دەپ جازدى ەرالى توعجانوۆ دەپۋتاتتىق ساۋالعا بەرگەن جاۋابىندا.
قولدانىستاعى زاڭناماعا تۇزەتۋلەر قابىلدانعاننان كەيىن ءبىلىم جانە عىلىمي مينيسترلىگى جوعارى جانە جوعارى وقۋ ورنىنان كەيىن ءبىلىم بەرۋ باعدارلامالارىن ىسكە اسىراتىن ۇيىمداردىڭ تىزبەسىن بەكىتەدى.
ء«بىلىمدى ۇلت» ساپالى ءبىلىم بەرۋ» ۇلتتىق جوباسىندا قازاقستاندىق جوعارى وقۋ ورىندارىن دامىتۋدىڭ 2021-2025 جىلدارعا ارنالعان كەشەندى ءتاسىل قاراستىرىلعان. بۇل ماقسات ءبىلىم بەرۋدى دامىتۋدىڭ 2021-2025 جىلدارعا ارنالعان تۇجىرىمداماسىندا دا كوزدەلگەن. جوعارى وقۋ ورىندارىنىڭ باسەكەگە قابىلەتتىلىگىن ارتتىرۋعا, ۋنيۆەرسيتەتتەردىڭ زەرتتەۋ جانە يننوۆاتسيالىق ەكوجۇيەسىن قالىپتاستىرۋعا باعىتتالعان «اكادەميالىق ۇستەمدىك ورتالىقتارى» جوباسى قولعا الىندى», دەدى پرەمەر-ءمينيستردىڭ ورىنباسارى.
ونىڭ ايتۋىنشا, ارنايى كەڭەس اكادەميالىق ۇستەمدىك ورتالىقتارىن قۇرۋ ءۇشىن 15 وڭىرلىك جانە 5 پەداگوگيكالىق جوعارى وقۋ ورنىنىڭ تىزبەسىن بەكىتكەن. سونداي-اق, نازارباەۆ ۋنيۆەرسيتەتىنىڭ تاجىريبەسى بويىنشا ەكى وڭىرلىك وزىق جوعارى وقۋ ورنىن قۇرۋ پىسىقتالىپ جاتىر.
«ماناش قوزىباەۆ اتىنداعى سولتۇستىك قازاقستان ۋنيۆەرسيتەتى, اقش-تىڭ اريزونا ۋنيۆەرسيتەتى جانە قر ءبىلىم جانە عىلىم مينيسترلىگى اراسىندا ۇشجاقتى مەموراندۋمعا قول قويىلدى. مەموراندۋم اياسىندا قوسديپلومدى ءبىلىم الۋ, جوعارى بىلىكتى وقىتۋشىلاردى تارتۋ, زەرتتەۋ الەۋەتىن ارتتىرۋ جانە وزىق تاجىريبە ورتالىعىن قۇرۋ قاراستىرىلعان. سولتۇستىك قازاقستان ۋنيۆەرسيتەتىنىڭ بازاسىندا ەكى مەكتەپ قۇرىلدى: نازارباەۆ ۋنيۆەرسيتەتىنىڭ باسقارۋىنداعى «الەۋمەتتىك-گۋمانيتارلىق عىلىمداردىڭ جوعارى مەكتەبى» جانە اريزونا ۋنيۆەرسيتەتىنىڭ سەنىمگەرلىك باسقارۋىنداعى «تەحنولوگيالار جانە جاراتىلىستانۋ عىلىمدارىنىڭ جوعارى مەكتەبى».
م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ بازاسىندا داشەتەلدىك ارىپتەستەرمەن بىرگە مەكتەپتەر اشىلادى. جاڭا كاسىپتەر اتلاسى نەگىزىندە يننوۆاتسيالىق ءبىلىم بەرۋ باعدارلامالارىن ازىرلەۋ, شەتەلدىك ارىپتەستەرمەن اكادەميالىق الماسۋ جۇمىستارى جالعاسىن تابادى. جالپى, جوعارى وقۋ ورىندارىن ءتورت توپ بويىنشا سارالاۋ جوعارى وقۋ ورىندارىن ءبىلىم بەرۋ قىزمەتتەرىنىڭ ساپاسىن ارتتىرۋعا مۇمكىندىك بەرەدى», ۆيتسە-پرەمەردىڭ جاۋابىندا.