سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, پەتروپاۆل تۇرعىنى پوليتسياعا ارىزدانىپ, ءوزىنىڭ الاياققا جەم بولعانىن ايتقان, دەپ حابارلايدى Egemen.kz.
وعان بەلگىسىز بىرەۋ بانكتىڭ قاۋىپسىزدىك قىزمەتىنەن ەكەنىن ايتىپ, اتىنا باسقا ادامنىڭ ۇلكەن نەسيە رەسىمدەگەنىن حابارلاعان. تەلەفون شالۋشى زاڭسىز ارەكەتتىڭ الدىن الۋ ءۇشىن «نەسيەلىك ليميت تاڭداۋدى» ۇسىنعان. سونداي-اق بىرنەشە بانكتەن 10 ملن تەڭگە نەسيە رەسىمدەتىپ, ونى «ساقتىق شوتقا» سالعىزعان. ول جەردەن اقشا بىردەن جوق بولعان.
«زارداپ شەگۋشى مۇنداي الاياقتار جايىندا بۇرىن ەستىگەن ەكەن, بىراق ءوزىن ءدال وسىلاي الدايدى دەپ ويلاماپتى. حابارلاسقان ادام زارداپ شەگۋشىگە ونىڭ ءاربىر ءىس ارەكەتىن بەلگىسىز بىرەۋلەردىڭ باقىلاپ وتىرعانىن, تەلەفونىنىڭ تىڭدالاتىنىن جانە كەز كەلگەن ۋاقىتتا جاڭا نەسيە رەسىمدەيتىنىن ايتىپ, سەندىرگەن. WhatsApp مەسسەندجەرى ارقىلى حابارلاسىپ, ونىڭ قازىرگى ۋاقىتتا ەڭ قاۋىپسىز بايلانىس قۇرالى ەكەنىن ايتقان. پسيحولوگيالىق تاسىلدەر ءارتۇرلى بولعانىمەن, ولاردىڭ ماقساتى ءبىر – قىلمىسكەرلەر ءوز قۇرباندارىن اسىقتىرىپ, ويلانۋعا مۇرسات بەرمەي, تەز شەشىم قابىلداتقىزادى», دەيدى پەتروپاۆل قالالىق پوليتسيا باسقارماسىنىڭ ەكىنشى پوليتسيا ءبولىمىنىڭ باستىعى رۋسلان سىزدىقوۆ.
پوليتسەيلەر بانكتىڭ قاۋىپسىزدىك قىزمەتى ەشقاشان كليەنتتەرگە تەلەفون سوقپايتىنىن جانە قانداي دا ءبىر قارجىلىق وپەراتسيا جاساۋدى تالاپ ەتپەيتىنىن ەسكەرتەدى.