پولشا-بەلارۋس شەكاراسىنداعى مىڭداعان ميگرانتتىڭ پروبلەماسى ەۋرووداق ەلدەرىنىڭ باساۋرۋىنا اينالدى. تاياۋ شىعىستان الدىمەن بەلارۋس ەلىنە كەلىپ, ەندى پولشا مەن بالتىق ەلدەرى ارقىلى ىشكى ەۋروپاعا ءوتۋدى كوزدەگەن بوسقىندار 8 قاراشادان بەرى دالادا تۇنەپ كەلەدى, دەپ جازادى Egemen.kz.
سوڭعى مالىمەتتەرگە سايكەس, بەلارۋس اۋماعىنان پولشا شەكاراسىن سوڭعى تاۋلىك ىشىندە 223 ميگرانت زاڭسىز كەسىپ وتپەك بولعان. بۇل – ميگرانتتاردىڭ اراسىندا «گەرمانياعا الىپ كەتۋگە كەلگەن اۆتوبۋس» جايلى قاۋەسەتتەر تاراتىپ, ميگرانتتاردى زاڭسىز ارەكەتكە يتەرمەلەگىسى كەلگەندەردىڭ ارەكەتى دەپ حابارلادى پولشانىڭ ىشكى ىستەر مينيسترلىگى. پولشا بيلىگى شەكارا اۋماعىنداعى بارلىق ازاماتتاردىڭ ۇيالى تەلەفوندارىنا بىرنەشە تىلدە ارنايى حابارلاما جىبەرىپ, بۇل قاۋەسەتكە سەنبەۋگە شاقىرۋدا.
پولياك قۇقىق قورعاۋ قىزمەتكەرلەرى 14 قاراشا كۇنى ەل اۋماعىنا زاڭسىز ەنگەن 77 ميگرانتتى ەلدەن شىعارىپ جىبەردى. شەكارانى زاڭسىز كەسىپ وتپەك بولعاندار شەكارا قىزمەتكەرلەرىنە تاس اتىپ, تارتىپسىزدىك جاساعان. سونىڭ سالدارىنان لاقتىرىلعان تاستاردىڭ ءبىرى شەكاراشىنىڭ باسىنا ءتيىپ, ونىڭ كاسكاسىن سىندىرىپ جىبەرگەن.
سونىمەن قاتار شەكارادا قويىلعان ارنايى بوگەتتەردى بۇزعان ءبىر توپ ادامنىڭ 22-ءسى ۇستالدى. كەيىن ولاردىڭ ءبارى يراك ازاماتتارى ەكەنى انىقتالعان. بۇزاقىلارعا زاڭسىز ارەكەت جاساۋعا كومەكتەسكەنى ءۇشىن گرۋزيانىڭ ەكى ازاماتى جانە پولشا مەن سيريا ازاماتتارى شەكاراشىلاردىڭ قولىنا ءتۇستى. ولارعا 13 ميگرانتتى شەكارادان زاڭسىز وتكىزبەك بولدى دەگەن ايىپ تاعىلۋدا.
پولشا قورعانىس مينيسترلىگىنىڭ ايتۋىنشا, بەلارۋس قۇقىق قورعاۋ قىزمەتكەرلەرىنىڭ تاراپىنان دا ارانداتۋشىلىق تىركەلۋدە.
«كەشە بەلارۋستاردىڭ پروۆوكاتسياسى كۇشەيە ءتۇستى. شۋدزيالوۆو اۋماعىندا ولاردىڭ قىزمەتكەرلەرى ءبىزدىڭ سولداتتارعا ەكى مارتە تاس اتقان. بۇل وقيعادان ەشكىم زارداپ شەككەن جوق», دەلىنگەن مينيسترلىكتىڭ تۆيتتەر-پاراقشاسىندا.
اتالعان ۆەدومستۆو باسشىسى پولشا شەكاراسىنىڭ مىزعىماستىعىن جانە قاتاڭ قورعاۋدا ەكەنىن ايتتى.
پولشا ءىىم-ءنىڭ ءباسپاسوز قىزمەتىنىڭ جازۋىنشا, مەملەكەتتىك قۇقىق قورعاۋ قىزمەتتەرى كەز كەلگەن جاعدايعا دايىن وتىر.
باتىس بۇل داعدارىستىڭ «قولدان جاسالعانىن» جانە لۋكاشەنكونىڭ ەۋروپا ەنگىزگەن سانكتسيالارعا قارسى جاۋابى دەپ باعالاۋدا. سونىمەن قاتار بۇعان رەسەيدىڭ دە قاتىسى بار دەگەن بولجامدار حالىقارالىق مەديادا ءجيى پايدا بولۋدا. رەسمي ۆارشاۆا لۋكاشەنكو مەن ءپۋتيندى «گانگستەرلىك تاكتيكا» مەن «گيبريدتىك مانيپۋلياتسيا» قولدانۋدا دەپ ايىپتاۋدا.