سولتۇستىك قازاقستان وبلىسىندا «براكونەر» جەدەل-پروفيلاكتيكالىق ءىس-شاراسى اياسىندا زاڭسىز اڭ اۋلاعاندار انىقتالىپ, ولاردى توقتاتۋ ءۇشىن قىزمەت قارۋىن قولدانۋعا تۋرا كەلدى, دەپ حابارلايدى Egemen.kz.
سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, تابيعاتتى قورعاۋ پوليتسياسى توبىنىڭ ينسپەكتورى تايىنشا اۋدانىنىڭ ۋچاسكەلىك پوليتسيا ينسپەكتورىمەن بىرگە «براكونەر» جەدەل-پروفيلاكتيكالىق ءىس-شاراسى اياسىندا رەيد وتكىزدى. ءتارتىپ ساقشىلارى كەڭەس اۋىلى ماڭىندا «ۆاز-2123» اۆتوكولىگىن بايقاعان.
جۇرگىزۋشى پوليتسەيلەردىڭ توقتاۋ تۋرالى تالابىنا باعىنباي, جاسىرىنباق بولعان. سوندىقتان ەسكەرتۋ جاساپ تابەلدىك قارۋدان اۋاعا اتۋعا تۋرا كەلگەن. كولىك سالونىندا 22 مەن 32 جاس ارالىعىنداعى اقمولا وبلىسىنىڭ ءتورت تۇرعىنى بولعان.
وقيعا ورنىنا شاقىرىلعان اۋداندىق پوليتسيا ءبولىمىنىڭ جەدەل-تەرگەۋ توبى كولىكتەن ءسىبىر ەلىگىنىڭ ەتىن جانە «يج-58» ماركالى تىركەلمەگەن اڭشى قارۋىن تاركىلەدى. ۇستالعانداردىڭ اڭ اتۋعا رۇقسات قۇجاتى بولماعان. اتالعان فاكتى «زاڭسىز اڭشىلىق» بابى بويىنشا تىركەلدى.
«سقو-دا «براكونەر» جەدەل-پروفيلاكتيكالىق ءىس-شاراسى 20 قازان مەن 19 قاراشا ارالىعىندا ءوتىپ جاتىر. تابيعاتتى قورعاۋ پوليتسياسى بولىنىستەرىنىڭ قىزمەتكەرلەرى قورىقشىلارمەن بىرلەسە اڭ اۋلاۋ قاعيدالارىنىڭ بۇزۋشىلىقتارىن انىقتاۋ, سونداي-اق اڭداردى-قۇستى براكونەرلىك جولمەن اۋلاۋ فاكتىلەرىنىڭ الدىن الۋ ءۇشىن ورمان القاپتارىندا رەيدتى كۇشەيتتى. ءىس-شارا وتكەن ۋاقىتتا اڭ اۋلاۋ قاعيدالارىن بۇزۋدىڭ 157 دەرەگى انىقتالدى. نەگىزىنەن قارۋدى جينالعان جانە وقتالعان كۇيدە تاسىمالداۋعا قاتىستى. ج ازاتايىم وقيعالاردى بولدىرماۋ ءۇشىن بۇعان ءۇزىلدى-كەسىلدى تىيىم سالىنعان. سونىمەن قاتار بالىق اۋلاۋ قاعيدالارىن بۇزۋدىڭ 34 فاكتىسى تىركەلدى», دەيدى سقو پد جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.