سولتۇستىك قازاقستان وبلىسىندا وتكەن تاۋلىكتە 161 ادام كوروناۆيرۋستى جۇقتىردى. ءوڭىر قاۋىپتى ينفەكتسيانىڭ تارالۋى بويىنشا ەلىمىزدە كوش باستاعان, دەپ حابارلايدى Egemen.kz.
وڭىرلىك كوممۋنيكاتسيالار قىزمەتىندە سقو-دا كوروناۆيرۋستىق ينفەكتسيانىڭ تارالۋى جانە ۆاكتسيناتسيا بارىسى بويىنشا اعىمداعى جاعداي تۋرالى بريفينگ ءوتتى. سانيتاريالىق-ەپيدەميولوگيالىق باقىلاۋ دەپارتامەنتى باسشىسى اسەت جۇماتاەۆتىڭ ايتۋىنشا, وتكەن تاۋلىكتە كۆي جۇقتىرۋدىڭ 161 جاعدايى تىركەلدى, ونىڭ ىشىندە 154-ءى, 95 %-ىندا اۋرۋ بەلگىلەرى بولعان.
سونىڭ ىشىندە پەتروپاۆلدىڭ – 76, قىزىلجاردا – 22, م.جۇماباەۆتا – 14, تايىنشادا – 11, جامبىلدا – 10, ەسىلدە – 7, اققايىڭدا – 6, مامليۋتتە – 5, ءۋاليحانوۆتا – 4, تيميريازەۆ اۋدانىندا – 3, اقجار اۋدانىندا – 2, ع.مۇسىرەپوۆ اتىنداعى اۋداندا 1 ادام كوروناۆيرۋس جۇقتىرعان.
«سوڭعى 2 اپتادا وبلىستا 2143 جاعداي تىركەلدى. اۋرۋشاڭدىق الدىنداعى ەكى اپتامەن سالىستىرعاندا 2071-دەن 2143-كە ارتقان. سونىڭ ىشىندە پەتروپاۆلدا اۋىرۋ 1,4 ەسەگە, 666-دان 953-كە دەيىن ءوستى», دەيدى اسەت جۇماتاەۆ.
جاقىندا وڭىردە 12 جانە ودان جوعارى جاستاعى جاسوسپىرىمدەرگە, جۇكتىلىكتىڭ 16-دان 37 اپتاسىنا دەيىنگى ارالىقتاعى جۇكتى ايەلدەرگە, بالا ەمىزەتىن ايەلدەرگە ەكپە ەگۋ باستالادى. Pfizer كومپانياسىنىڭ «كوميرناتي» ۆاكتسيناسى جاسوسپىرىمدەردى كوروناۆيرۋسقا قارسى يممۋنداۋ ءۇشىن قولدانىلادى. ۆاكتسينا قۇرامىندا يممۋندىق قورعانىستى دامىتاتىن ۆيرۋس جوق جانە كۆي ينفەكتسياسىن تۋدىرمايدى.
«باستاپقى كەزەڭدە كۆي-عا قارسى پروفيلاكتيكالىق ەگۋلەر 16 مەن 18 جاس ارالىعىنداعى جاسوسپىرىمدەردەن باستالادى. ودان كەيىن كەزەكپەن باسقا جاس توپتارىنداعى جاسوسپىرىمدەر - 15, 14, 13 جانە 12 جاس - كەزەكپەن ەگىلەدى. قازاقستاندا جاسوسپىرىمدەردى ەگۋ ەرىكتى تۇردە جانە ولاردىڭ اتا-انالارى مەن زاڭدى وكىلدەرىنىڭ كەلىسىمىمەن عانا جۇرگىزىلەدى», دەيدى وبلىستىڭ باس سانيتار دارىگەرى.
سقو 2 قازاننان بەرى «قىزىل» ايماقتا. بۇگىندە كوروناۆيرۋستى جۇقتىرۋدان ەلىمىزدە ءبىرىنشى ورىندا كەلەدى. ەكىنشى ورىندا 146 جاعدايمەن الماتى قالاسى, ءۇشىنشى ورىندا 135 كورسەتكىشپەن قاراعاندى وبلىسى تۇر. جالپى پاندەميا باستالعالى سقو-دا 30,5 مىڭ ادام قاۋىپتى ينفەكتسيانى جۇقتىردى.