سولتۇستىك قازاقستان وبلىسىنداعى اۆتوجولدا قيىرشىق تاس ارتقان كاماز جۇك كولىگى اۋدارىلىپ, ورتەندى, دەپ حابارلايدى Egemen.kz.
بۇگىن تايىنشا اۋدانى وبۋحوۆكا ەلدى مەكەنى ماڭىنداعى اۆتوجولدا كاماز اۋدارىلىپ, كولىكتىڭ كابيناسىنان ءورت شىقتى. جول-كولىك وقيعاسى بەينەلەنگەن ۆيدەو الەۋمەتتىك جەلىدە جاريالاندى.
اپاتقا كوكتايعاق سەبەپ بولعان. بۇگىن تۇندە سقو-دا قالىڭ قار جاۋىپ, ونىڭ ارتى كوكتايعاققا ۇلاسقان ەدى. سقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە, وقيعا جايىندا بۇگىن ساعات 9:56 مينۋت كەتكەندە حابار تۇسكەن. قوڭىراۋ شالعاندار «نۇر-سۇلتان-پەتروپاۆل» اۆتوموبيل جولىندا كاماز كولىگىنىڭ اۋدارىلىپ, جانىپ جاتقانىن ايتقان. كومەككە جاقىن ماڭداعى كەللەروۆكا ەلدى مەكەنىنىڭ ءورت سوندىرۋشىلەرى جەتتى. وقىس وقيعادان زارداپ شەككەندەر جوق.
جول-كولىك وقيعاسى جايىندا سقو پوليتسيا دەپارتامەنتى دە تۇسىنىك بەردى. مامانداردىڭ ايتۋىنشا, قولايسىز اۋا رايىنا بايلانىستى جۇرگىزۋشى رۋلگە يە بولا الماي, كولىكتىڭ اۋدارىلىپ قالۋىنا جول بەرگەن. سونىڭ سالدارىنان جۇك كولىگىنەن وت شىققان.