سولتۇستىك قازاقستان وبلىسىندا قۇس تۇماۋى انىقتالعان لەبياجە ەلدى مەكەنىنەن ۆەتەريناريالىق ءىس-شارالار كەشەنىنىڭ اياقتالۋىنا بايلانىستى كارانتين الىندى, دەپ حابارلايدى Egemen.kz.
اشىق نورماتيۆتىك قۇقىقتىق اكتىلەر سايتىندا كارانتيندى توقتاتۋ تۋرالى قۇجاتتىڭ جوباسى جاريالاندى. ماعجان جۇماباەۆ اۋدانىنىڭ باس مەملەكەتتىك ۆەتەريناريالىق-سانيتاريالىق ينسپەكتورىنىڭ 3 قاراشاداعى ۇسىنىسى نەگىزىندە لەبياجە اۋىلدىق وكرۋگىنىڭ اكىمى شەشىم قابىلداپ, كارانتيندى الدى. وعان قۇس تۇماۋى اۋرۋىنىڭ الدىن الۋ جانە وقشاۋلاۋعا قاتىستى اتقارىلعان ۆەتەريناريالىق جۇمىستاردىڭ اياقتالۋى سەبەپ بولعان.
«اسا قاۋىپتى اۋرۋ وشاعى – جوعارى پاتوگەندى قۇس تۇماۋىن وقشاۋلاۋ جانە جويۋ بويىنشا ۆەتەريناريالىق ءىس-شارالار كەشەنى وتكىزىلدى. 3 قاراشاداعى زەرتحانالىق زەرتتەۋلەردىڭ ناتيجەسى بويىنشا 20 سىناما كورسەتكىشى – تەرىس. وسىنىڭ نەگىزىندە شەكتەۋلەردى الۋ تۋرالى شەشىم قابىلداندى», دەلىنگەن تۇسىندىرمە جازبادا.
ەستەرىڭىزگە سالايىق, 27 قىركۇيەك كۇنى لەبياجە ەلدى مەكەنى قۇس تۇماۋى وشاعىنىڭ انىقتالۋىنا بايلانىستى كارانتينگە جابىلعان ەدى. ءبىر اپتانىڭ ىشىندە اۋىل تۇرعىندارىنىڭ مىڭنان استام قۇسى قىرىلىپ قالدى.
ۆەتەريناريا باسقارماسىنداعىلار قۇس تۇماۋىمەن كۇرەستە اتقارىلعان جۇمىس جايىندا ەسەپ بەرىپ, زارداپ شەككەن تۇرعىندارعا وتەماقى تولەنەتىنىن ايتتى.