قىتايدىڭ شىعىسىنداعى چجەتسزيان پروۆينتسياسىنىڭ سۋ ايدىنىندا ەكى كەمەنىڭ سوقتىعىسۋى سالدارىنان ءبىر ادام مەرت بولدى, تاعى ەكى ادام حابار-وشارسىز جوعالىپ كەتتى, دەپ حابارلايدى Egemen.kz.
وقيعا سارسەنبى كۇنى كەشكە چجوۋشان ارالدارىنىڭ شىعىسىندا بولعان. اپات بەلگىسى پانامادا تىركەلگەن جۇك كەمەسى مەن قىتايلىق بالىق اۋلايتىن شحۋنانىڭ سوقتىعىسۋىنان كەيىن الىنعان. وقيعا ورنىنا كەلگەن قۇتقارۋشىلار سۋدان ءتورت ادامدى تاۋىپ الىپ شىقتى, تاعى بىرەۋى كوز جۇمعان, ەكەۋى ازىرگە حابار-وشارسىز. ىزدەۋ-قۇتقارۋ جۇمىستارىنا جاقىن ماڭداعى جاعالاۋ كۇزەتىنىڭ كەمەلەرى, بالىق اۋلايتىن جانە وزگە دە ازاماتتىق كەمەلەر تارتىلۋدا. تج ورىن العان اۋماقتا كەمە قاتىناسى ۋاقىتشا شەكتەلگەن.