الماتى پد باسشىسى قانات تايمەردەنوۆ الاتاۋ اۋدانىندا ورىن العان اتىس فاكتىسى بويىنشا قىلمىستىق كودەكستىڭ ەكى بابى بويىنشا تەرگەۋ باستالعانىن ايتتى, دەپ حابارلايدى Egemen.kz.
پوليتسيا دەپارتامەنتىندە وتكىزىلگەن بريفينگ بارىسىندا قانات تايمەردەنوۆ بولعان وقيعانىڭ ەگجەي-تەگجەيىن ايتىپ بەردى. جۋرناليستەرمەن كەزدەسۋ باسىندا ول قازا بولعانداردىڭ جاقىندارىنا كوڭىل ايتتى.
ونىڭ ايتۋىنشا, «كىسى ءولتىرۋ» جانە «بيلىك وكىلىنە شابۋىل جاساۋ» باپتارى بويىنشا ەكى قىلمىستىق ءىس قوزعالدى. كۇدىكتى ۋۇي-عا قاماۋعا الىنىپ, تەرگەۋ جۇمىستارى وتكىزىلۋدە. ونىڭ اتىنا قارۋ 2008 جىلدان بەرى تىركەلگەنى بەلگىلى بولدى. كۇدىكتى پسيحياتريالىق ديسپانسەردە تىركەلمەگەن.
ۆەدومستۆوارالىق جەدەل توپ قۇرىلدى, تەرگەۋ ناتيجەلەرى بويىنشا پوليتسيا الداعى ۋاقىتتا تولىق اقپارات بەرەدى.
قازا تاپقان پوليتسەيلەردىڭ وتباسىلارىنا كومەك كورسەتىلەدى.
قازا تاپقان س. د. 2003 جىلدان باستاپ ىشكى ىستەر ورگاندارىندا جۇمىس ىستەدى, ونىڭ بەس بالاسى بار.
ال ب. پوليتسيادا 2004 جىلدان بەرى جۇمىس ىستەپ كەلگەن. ونىڭ ارتىندا ەكى بالاسى قالدى.
ەسكە سالا كەتسەك, 20 قىركۇيەكتە الماتى قالاسىنىڭ الاتاۋ اۋدانىندا 54 جاستاعى ەر ادام وق جاۋدىردى. وقيعا سالدارىنان بەس ادام مەرت بولدى. ولاردىڭ اراسىندا سوت ورىنداۋشىسى, ەكى پوليتسيا قىزمەتكەرى جانە ەكى ازامات بار. ازاماتتاردىڭ ءبىرى - ءۇيدىڭ جاڭا يەسى ەكەنى بەلگىلى بولدى.
ەر ازامات ۇستالدى. كىسى ولتىرگەنى ءۇشىن ول 20 جىلعا دەيىن نەمەسە ءومىر بويىنا باس بوستاندىعىنان ايىرىلۋى مۇمكىن.