بيىل ماۋسىم ايىندا ۇلتتىق ستاتيستيكا بيۋروسىنىڭ مالىمەتى بويىنشا الماتىنىڭ ەكى ميلليونىنشى تۇرعىنى ومىرگە كەلگەنىن ايتقان ەدىك. قالا كۇنى التى بالا ءوسىرىپ وتىرعان بۇل وتباسى ءۇشىن قۋانىشتى كۇنگە اينالدى. ايالانىڭ اتا-اناسىنا سۋ جاڭا ءۇش بولمەلى پاتەر سىيعا تارتىلدى.
ەكى ميلليونىنشى الماتىلىق ايالا جامبىل پوليتسيا قىزمەتكەرى بەيبىت ابىلداەۆ پەن بالاباقشا تاربيەشىسى ءاليا جانىبەكوۆانىڭ وتباسىندا ءومىر ەسىگىن اشقان. ول وتباسىنداعى التىنشى قىز. بۇعان دەيىن كوپبالالى وتباسى تۋىستارىنىڭ ءۇيىن پانالاپ كەلگەن. باسپانا جىرىنا نۇكتە قويىپ, شاھار باسشىسىنىڭ قولىنان پاتەر كىلتىن العان جانداردىڭ قۋانىشىندا شەك جوق.
«انا رەتىندە بالالارىمنىڭ تۋعان كۇندەرى ەڭ باقىتتى ءسات بولسا, ال بۇگىن پاتەر كىلتىن الۋ ەشقاشان ۇمىتىلمايتىن ەڭ باقىتتى كۇن. ءبىز مۇنداي سىيلىق الامىز دەپ ويلاعان جوق ەدىك», دەيدى ايالانىڭ اناسى.
قالا كۇنى باسپانادان تارىققان تالايدىڭ الىستاعى ارمانىن جاقىنداتتى. اتاپ ايتقاندا, 227 كوپبالالى وتباسى «نۇرلى جەر» باعدارلاماسى بويىنشا مەگاپوليستىڭ ناۋرىزباي اۋدانىندا سالىنعان جاڭا پاتەرگە كىردى.
قونىستانۋشىلاردى قۇتتىقتاعان ب.ساعىنتاەۆ تۇرعىندارعا الەۋمەتتىك قامقورلىق تانىتۋ مەملەكەتتىك ساياساتتىڭ باستى باعىتى ەكەنىن ايتىپ, الماتىدا جىل باسىنان بەرى 2 340 مۇقتاج وتباسىعا جەڭىلدەتىلگەن نەسيەمەن تۇرعىن ءۇي بەرىلگەنىن مالىمدەدى. اكىمنىڭ سوزىنشە, كوممۋنالدىق تۇرعىن ءۇي قورىنان – 41; «باقىتتى وتباسى» رەسپۋبليكالىق باعدارلاماسى اياسىندا كوپبالالى, تولىق ەمەس وتباسىلار مەن مۇگەدەك بالالاردى تاربيەلەپ وتىرعان جاندارعا 181 نەسيەلىك زاەم راسىمدەلگەن.
اسىرەسە, كوپبالالى وتباسىلارعا بەرىلەتىن نەسيە سانىن ۇلعايتۋ ماقساتىندا جەرگىلىكتى بيۋدجەتتەن نەسيەلەردى قوسىمشا قارجىلاندىرۋعا 3,3 ملرد تەڭگە ءبولىنىپتى. بۇل شارا تاعى 223 جانعا نەسيە بەرۋگە مۇمكىندىك تۋدىرماق. «باقىتتى وتباسى» باعدارلاماسى اياسىندا 1 013 وتباسىن باسپانامەن قامتاماسىز ەتۋ جوسپارلانعان.
قالا بيلىگى تاراپىنان تۇرعىن ءۇي باعدارلامالارىنا قاجەتتى العاشقى تولەمنىڭ ءبىر بولىگىن قامتاماسىز ەتۋگە جاردەمدەسۋ ءۇشىن 1 ملن تەڭگە سوماسىنداعى تۇرعىن ءۇي سەرتيفيكاتتارى الەۋمەتتىك كومەك تۇرىندە وتەۋسىز جانە قايتارىمسىز نەگىزدە بەرىلىپ كەلەدى. بۇل ءۇشىن جەرگىلىكتى بيۋدجەتتەن 2 ملرد تەڭگە قاراستىرىلعان. قالانىڭ كەزەكتە تۇرعان تۇرعىن ءۇي سەرتيفيكاتىن الۋشىلار – ءى جانە ءىى توپتاعى مۇگەدەكتەر, مۇگەدەك بالالارى بار نەمەسە ولاردى تاربيەلەپ وتىرعاندار, جەتىم بالالار مەن اتا-انا قامقورلىعىنان ايىرىلعاندار, سونداي-اق كوپبالالى وتباسىلار.
الماتى