قاسىم-جومارت توقاەۆ جاڭا كەزەڭدە ورتالىق ازيادا تۇراقتى دامۋدى قامتاماسىز ەتۋ ءۇشىن ايماق ەلدەرى بىرلەسىپ ارەكەت ەتۋى ءتيىس دەپ سانايدى. بۇل تۋرالى مەملەكەت باسشىسى ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىندە ايتتى, دەپ جازادى Egemen.kz.
مەملەكەت باسشىسىنىڭ ايتۋىنشا, ەلدەر اراسىنداعى تاۋار اينالىمىن ارتتىرۋ, ونىڭ قۇرىلىمىن جاقسارتۋ جانە جەتكىزىلەتىن تاۋار تۇرلەرىن كەڭەيتۋ بويىنشا جۇمىستى جانداندىرۋ قاجەت. قازاقستان ورتالىق ازيا ەلدەرىنە ەكسپورتتىق تاسىمالدى 1 ميلليارد اقش دوللارىنا دەيىن ۇلعايتا الادى.
«مۇنداي قور ايماقتىڭ باسقا دا ەلدەرىندە بار ەكەنىنە سەنىمدىمىن. ورتالىق ازيانىڭ كولىك دالىزدەرىنە ينتەگراتسيالانعان تاۋار وتكىزۋدىڭ بىرىڭعاي جەلىسىن قۇرۋدا كۇش جۇمىلدىرۋدى ۇسىنامىز. بۇل كوتەرمە-ءبولۋ جانە اگرولوگيستيكالىق ورتالىقتاردان تۇراتىن جاڭا ينفراقۇرىلىم تاۋارلارىمىزدى ەۋرازيا ەكونوميكالىق وداقتىڭ, تمد جانە ءۇشىنشى مەملەكەتتەردىڭ نارىعىنا شىعارۋعا مۇمكىندىك بەرەدى. ماۋسىمارالىق كەزەڭدە ءوز نارىعىمىزدى دا اۋىل شارۋاشىلىعى ونىمدەرىمەن قامتاماسىز ەتۋگە جاعداي جاسايدى», دەدى پرەزيدەنت.
مەملەكەت باسشىسى تابىستى سەرىكتەستىكتىڭ ۇلگىسى رەتىندە قازاقستان مەن وزبەكستاننىڭ ورتاق شەكاراسىندا قۇرىلعان «ورتالىق ازيا» حالىقارالىق ساۋدا-ەكونوميكالىق ىنتىماقتاستىق ورتالىعىن اتاپ ءوتتى. قاسىم-جومارت توقاەۆ پرەزيدەنتتەردى ايماقتىق ەكونوميكانىڭ ستراتەگيالىق ماڭىزدى سالالارىنا ينۆەستيتسيا تارتۋ ءۇشىن كۇش-جىگەردى بىرىكتىرۋگە شاقىردى.