قازاقستان پرەزيدەنتى بۇۇ باس اسسامبلەياسىنىڭ توراعاسى ۆولكان بوزكىرمەن كەزدەسۋ وتكىزدى, دەپ حابارلايدى Egemen.kz اقورداعا سىلتەمە جاساپ.
كەزدەسۋ بارىسىندا قازاقستان مەن بىرىككەن ۇلتتار ۇيىمى اراسىنداعى ىنتىماقتاستىقتىڭ باسىم باعىتتارى تالقىلاندى. پاندەمياعا قارسى كۇرەستەگى بىرلەسكەن ءىس-قيمىلدارعا, سونداي-اق وڭىرلىك قاۋىپسىزدىك پەن تۇراقتىلىقتى قامتاماسىز ەتۋگە ەرەكشە نازار اۋدارىلدى.
پرەزيدەنت قاسىم-جومارت توقاەۆ بۇۇ باس اسسامبلەياسىنىڭ توراعاسى ۆولكان بوزكىردىڭ قازاقستان مەن ايماققا جاساعان ساپارى ورتالىق ازيانىڭ ءرولى ارتىپ كەلە جاتقانىن كورسەتەتىنىن اتاپ ءوتتى.
– ورتالىق ازيادا بولىپ جاتقان احۋالدى باعالاۋ تۇرعىسىنان ءسىزدىڭ بۇل ساپارىڭىز اسا ماڭىزدى. اتالعان ايماق جاھاندىق ساياسات اياسىندا زور ماڭىزعا يە بولىپ كەلە جاتىر. ءوزىڭىزدى بۇۇ باس اسسامبلەياسىنىڭ سايلانعان توراعاسى رەتىندە كورگەنىمە قۋانىشتىمىن. ءسىزدىڭ وسى جاۋاپتى ءارى ماڭىزدى ميسسياڭىز تابىستى بولادى دەپ ويلايمىن. ءبىز بىرىككەن ۇلتتار ۇيىمىن مۋلتيلاتەراليزمنىڭ دىڭگەگى رەتىندە قاراستىرامىز. قازاقستان بۇۇ-نىڭ ماقساتتارىن تولىق قولدايدى. اسسامبلەيا ءسىزدىڭ دانا باسشىلىعىڭىزبەن ۇيىمنىڭ ماقساتىنا قول جەتكىزۋىنە, اسىرەسە, قالىپتى ءومىردىڭ بارلىق سالاسىنا اسەر ەتكەن پاندەميانىڭ تەرىس سالدارى كەزىندە ەلەۋلى ۇلەس قوسادى, – دەدى قازاقستان پرەزيدەنتى.
مەملەكەت باسشىسى حالىقارالىق قوعامداستىقتىڭ پاندەميا سالدارىنا قارسى كۇرەستە جۇدىرىقتاي جۇمىلۋى قاجەت دەپ سانايدى.
– قازاقستان حالىقارالىق قوعامداستىقتىڭ جاۋاپتى مۇشەسى رەتىندە داعدارىستىڭ سالدارىن ەڭسەرۋ ءۇشىن بارلىق كۇش-جىگەرىن جۇمسايدى. ءبىز ءوزىمىزدىڭ ءتول ۆاكتسينامىزدى ازىرلەدىك. كەلەشەكتە, قاجەت بولعان جاعدايدا, ونى مۇقتاج ەلدەرگە ۇسىنۋعا دايىنبىز, – دەدى پرەزيدەنت.
ۆولكان بوزكىر قاسىم-جومارت توقاەۆقا جىلى قابىلداعانى ءۇشىن العىس ايتىپ, قازاقستاننىڭ بۇۇ قاۋىپسىزدىك كەڭەسىنە توراعالىعىنىڭ قورىتىندىلارىن, سونداي-اق, سيريا قاقتىعىسىن رەتتەۋ ءۇشىن جۇرگىزگەن جۇمىستارىن جوعارى باعالادى.
– قازاقستان بىرىككەن ۇلتتار ۇيىمىنىڭ جۇمىسىنا وتە بەلسەندى اتسالىسادى. ءسىز بۇۇ جۇيەسىندە كوپ جىل جۇمىس ىستەدىڭىز. تاجىريبەڭىز مول. ەلدىڭ باسشىلىعى دا ۇيىممەن بەلسەندى ىقپالداستىق جاسايدى. قازاقستاننىڭ سيريا قاقتىعىسىن استانا پروتسەسى رەتىندە بەلگىلى بەيبىت جولمەن رەتتەۋگە قوسقان ۇلەسىن قولدايمىن, – دەدى بۇۇ باس اسسامبلەياسىنىڭ توراعاسى.
سونىمەن قاتار اڭگىمەلەسۋ بارىسىندا اۋعانستانداعى احۋالعا بايلانىستى وڭىرلىك قاۋىپسىزدىك پەن تۇراقتىلىقتى قامتاماسىز ەتۋ ماسەلەلەرى دە ءسوز بولدى.