سولتۇستىك قازاقستان وبلىسىندا جەرگىلىكتى پوليتسيا قىزمەتىنىڭ اۆتوپاركى 86 جاڭا كولىكپەن تولىقتى, دەپ حابارلايدى Egemen.kz.
سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, 86 وتاندىق اۆتوكولىك وبلىستىق بيۋدجەت ەسەبىنەن ليزينگىلىك قارجىلاندىرۋ اياسىندا ساتىپ الىنعان. بارلىق كولىكتەر ۋچاسكەلىك پوليتسيا ينسپەكتورلارىنىڭ جۇمىسىنا ارنالعان. ساتىپ الىنعان كولىكتەردىڭ باسىم بولىگى اۋىلدارعا جىبەرىلەدى. ەلدى مەكەندەردە ءبىر ۋچاسكەلىك پوليتسيا ينسپەكتورى بىرنەشە اۋىلعا قىزمەت كورسەتەدى. اكىمشىلىك ۋچاسكە 100 شاقىرىمعا دەيىن سوزىلۋى مۇمكىن.
«قوعامدىق قاۋىپسىزدىكتى قامتاماسىز ەتۋ – باسىمدىقتى مىندەت. ماتەريالدىق-تەحنيكالىق بازانى جاقسارتۋ جانە زاماناۋي تەحنيكالارمەن جابدىقتاۋ وڭ ناتيجەلەرىن بەرىپ جاتىر. سوڭعى 5 جىلدا قىلمىس سانىنىڭ ازايعانىن بايقايمىز», دەدى وبلىس اكىمى قۇمار اقساقالوۆ.
قازاقستان پوليتسياسى كۇنى قارساڭىندا ءوڭىر باسشىسى جۇمىستا جوعارى كورسەتكىشتەرمەن ەرەكشەلەنگەن قىزمەتكەرلەرگە گراموتالار مەن العىس حاتتار تابىستادى.
«پرەزيدەنت ءوز جولداۋىندا جۇمىستىڭ سەرۆيستىك مودەلىنە كوشۋ اياسىندا «جۇرتقا جاقىن پوليتسيا» قاعيداتىن جۇزەگە اسىرۋ مىندەتىن قويدى. ياعني ۋچاسكەلىك پوليتسيا ينسپەكتورىنىڭ جاۋاپكەرشىلىگى ارتادى, الايدا ونىڭ ناتيجەلى جۇمىسى ءۇشىن بارلىق مۇمكىندىكتەر جاسالۋى كەرەك. وسى تاپسىرمانى ورىنداۋ ءۇشىن وڭىردە قىزمەتتىڭ بۇل ءتۇرىن ماتەريالدىق-تەحنيكالىق جاعىنان نىعايتۋ جۇمىستارى جۇرگىزىلىپ جاتىر, بۇل ءوز كەزەگىندە پوليتسەيلەردىڭ ءموبيلدى بولۋىنا ىقپال ەتەدى», دەدى سقو پد باستىعى مارات تولەباەۆ.
سقو-دا 289 ۋچاسكەلىك پوليتسيا ينسپەكتورى جۇمىس ىستەيدى, ونىڭ 88-ءى وبلىس ورتالىعىندا. جىل باسىنان ولار 800-دەن استام قىلمىستىڭ بەتىن اشىپ, 30 مىڭعا جۋىق قۇقىق بۇزۋشىلىقتى انىقتادى. تۇرعىلىقتى جەرى بويىنشا ۇنەمى تەكسەرىلىپ وتىراتىن شارتتى تۇردە مەرزىمىنەن بۇرىن بوساتىلعاندار, بۇرىن سوتتالعاندار ەرەكشە باقىلاۋعا الىنعان.
سونداي-اق ماسكۇنەمدەر, ناشاقورلار دا نازارعا الىنعان. جىل باسىنان 113 سولتۇستىكقازاقستاندىق ماسكۇنەمدىكتەن ماجبۇرلەپ ەمدەلۋگە جىبەرىلدى. 6220 ادام ۋچاسكەلىك پوليتسيا ينسپەكتورلارىنىڭ پروفيلاكتيكالىق ەسەبىندە تۇر.
ۋچاسكەلىك پوليتسەيلەردىڭ باسىم بولىگى ۆيدەوجەتوندارمەن جانە پلانشەتتەرمەن جابدىقتالعان. بۇل, جۇمىستى بارىنشا ءتيىمدى, جەدەل جانە اشىق ەتەدى.