ايماقتاعى رەسپۋبليكالىق ماڭىزى بار جولداردىڭ 85 پايىزى جانە وبلىستىق ماڭىزى بار جولداردىڭ 61 پايىزىنىڭ احۋالى ورتاشا نەمەسە جامان ەمەس دەۋگە بولادى. بىراق, بۇل – ورتاشا رەسپۋبليكالىق كورسەتكىشتەن تومەن. ساپالى جول – قاۋىپسىزدىك كەپىلى. بۇل تۋرالى پرەزيدەنت قاسىم-جومارت توقاەۆ اتىراۋ وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەستە ايتتى, دەپ حابارلايدى Egemen.kz.
– وبلىستا جول اپاتىنىڭ جيىلەپ كەتۋى ءبارىمىزدى, ەڭ الدىمەن, جەرگىلىكتى ازاماتتاردى الاڭداتادى. بىلتىر وڭىردە 232 جول-كولىك وقيعاسى بولدى. سونىڭ سالدارىنان 69 ادام, سونىڭ ىشىندە 6 بالا قايتىس بولدى. مۇنداي احۋال جىل سايىن قايتالانۋدا. اسىرەسە, «ورال-اتىراۋ» تاس جولىنا باسا نازار اۋدارعان ءجون, – دەدى پرەزيدەنت.
مەملەكەت باسشىسىنىڭ ايتۋىنشا, وكىنىشكە قاراي, بۇل جول ادام ومىرىنە ۇنەمى قاۋىپ ءتوندىرىپ وتىر. بيىلعى ەكى اي ىشىندە وسى جولدىڭ بويىندا 7 جول-كولىك وقيعاسى بولىپ, 17 ادام قازا تاپقان. سونداي-اق, 15 ادام زارداپ شەكتى. ءبىر عانا جول اپاتىنان 15 بالا جەتىم قالدى.
«بۇنداي جاعدايعا جول بەرمەۋىمىز كەرەك. ۇكىمەت پەن وڭىردەگى اكىمدىكتەردىڭ مىندەتى – جول قاۋىپسىزدىگىن بارىنشا قامتاماسىز ەتۋ. «ورال-اتىراۋ» تاس جولىنىڭ ايماق ءۇشىن ستراتەگيالىق ماڭىزى زور. بارلىق جولاۋشى جانە جۇك تاسىمالى وسى جول ارقىلى وتەدى. اۆتوجولدىڭ بويىندا كولىك تۇراعى جوقتىڭ قاسى. شىن مانىندە, جولدىڭ ساپاسى كوڭىل كونشىتپەيدى», دەدى مەملەكەت باسشىسى.