سولتۇستىك قازاقستان وبلىسىندا بۇعان دەيىن ءبىر جىلدا ەكى اۋىلدىق وكرۋگتىڭ, ءۇش اۋىلدىڭ جانە كەيبىر اۋىلدىق ەلدىمەكەندەر كوشەلەرىنە بەرىلگەن 336 اتاۋ وزگەرىپ, قازاقشا اتالعانى تۋرالى ايتقان بولاتىنبىز. سونىمەن بىرگە وبلىستىڭ بەس مادەنيەت جانە ءبىلىم بەرۋ نىساندارىنا قازاق حالقىنىڭ اسا كورنەكتى تۇلعالارى ابايدىڭ, قوجابەرگەن جىراۋدىڭ, اقان سەرىنىڭ, ماعجان اقىننىڭ جانە ءانشى ەرمەك سەركەباەۆتىڭ ەسىمدەرى بەرىلدى, دەپ حابارلايدى Egemen.kz.
جۋىردا وبلىستىق ونوماستيكالىق كوميسسيا ءوزىنىڭ وتىرىسىندا تاعى دا 103 كوشە اتاۋلارىن اۋىستىرىپ, قازاقى جانە قازاقستانعا قاتىستى اتاۋلاردى بەكىتتى. ءسويتىپ يدەولوگيالىق تۇرعىدان ەسكىرگەن, قازاق ەلىنە سىرتتان اكەلىپ تاڭىلعان, ەل مەن جەردىڭ ەجەلگى تاريحىن ۇمىتتىرۋعا باعىتتالعان جۇزدەگەن اتاۋلار جويىلدى. ونىڭ ىشىندە «كومسومولسكي», «كوممۋنيستيچەسكي», «وكتيابرسكي», «سوۆەتسكي», «پيونەرسكي» سياقتى بولشەۆيكتىك يدەولوگيانىڭ اتاۋلارى بار. سونىمەن بىرگە كيروۆ, لەنين, فۋرمانوۆ, كالينين, كرۋپسكايا, ۋريتسكي, ششورس, وردجونيكيدزە جانە ت.ب. توڭكەرىسشىل كوسەمدەر مەن كومپارتيا باسشىلارىنىڭ ەسىمدەرى بولدى. جاسىراتىنى جوق, كومپارتيانىڭ يدەولوگياسى ەڭ تۇكپىردەگى اۋىلدارعا دەيىن جەتىپ, ول جەردەگى حالىقتىڭ ءبارى جەر-سۋ, كوشە اتتارى ارقىلى دا توڭكەرىسشىل يدەيانى باستارىنا ءسىڭىرىپ وسكەن. اسىرەسە, كەلىمسەكتەر كوپ قونىستانعان ەلدىمنەكەندەردە قازاقستانعا جانە جەر يەسى قازاققا قاتىستى بىردە-ءبىر اتاۋلار بولمايتىن. بولعان اتاۋلاردىڭ ءبارىن باسقىنشى يدەلولوگيا جويىپ جىبەرىپ, جادىلاردان جوق قىلعان.
ەندى تاۋەلسىز قازاقستانمەن تىعىز بايلانىستى, جەرگىلىكتى حالىقتىڭ تاريحى مەن تاعدىرىنىڭ, مادەنيەتى پەن ونەر قايراتكەرلەرىنىڭ, ۇلتتىق ۇلى تۇلعالارىنىڭ, سوعىس پەن ەڭبەكتىڭ قاھارماندارىنىڭ ەسىمدەرى جانە ەجەلگى جەر, سۋ اتاۋلارى يدەولوگيالىق تۇرعىدان ەسكىرگەن اتاۋلاردىڭ ورنىن باسۋدا. مىسالى, ەسىل اۋدانىنداعى يلينكا اۋىلىنىڭ ورتالىق كوشەسى بۇرىن لەنين اتىندا بولسا ەندى اباي بولىپ قايتا اتالدى. سول سياقتى وبلىس ەلدىمەكەندەرىنىڭ كوشەلەرىنە قازاق جەرىنىڭ قورعاۋشىلارى بولعان ابىلاي مەن ونىڭ باتىرلارىنىڭ, اقىن-جازۋشىلار ماعجان جۇماباەۆتىڭ, مۇحتار اۋەزوۆتىڭ, ءسابيت مۇقانوۆتىڭ, جاقان سىزدىقوۆتىڭ, جىر الىبى جامبىلدىڭ, تۇڭعىش عالىمىمىز شوقان ءۋاليحانوۆتىڭ, اعارتۋشى - پەداگوگتارىمىز ىبىراي التىنساريننىڭ, احمەت بايتۇرسىنوۆتىڭ, عالىم ەبىنەي بۋكەتوۆتىڭ, ءىى دۇنيەجۇزىلىك سوعىستىڭ قاھارماندارى, كەڭەس وداعىنىڭ باتىرلارى باۋىرجان مومىش ۇلىنىڭ, تالعات بيگەلدينوۆتىڭ, جالەل قيزاتوۆتىڭ, ءاليا مولداعۇلوۆانىڭ, مەملەكەت قايراتكەرلەرى دىنمۇحامەد قوناەۆتىڭ, ەركىن اۋەلبەكوۆتىڭ, قازاق ونەرىنىڭ شوق جۇلدىزدارى قۇرمانعازىنىڭ, ءشامشى قالداياقوۆتىڭ ەسىمدەرى بەرىلدى. سونىمەن بىرگە كەيبىر بۇرىن ماعىناسىز اتتار العان نەمەسە اتى بولماعان كوشەلەر جەڭىس, تاۋەلسىزدىك, دوستىق, ەسىل, بەيبىتشىلىك, بولاشاق, بىرلىك, ۇلى دالا, تۇران, بايتەرەك جانە ت.ب. سياقتى قازاقى اتاۋلار الدى. ونوماستيكالىق كوميسسيانىڭ وتىرىسىندا بۇل كوشەلەردىڭ ءبارى پەرسپەكتيۆاسى بار, ەرتەڭ جويىلىپ نەمەسە ۇيلەرى جابىلىپ قالاتىن كوشەلەر ەمەس, جوندەلگەن نەمەسە الداعى ۋاقىتتا جوندەۋ جۇمىستارى بەلگىلەنگەن كوشەلەر ەكەندىگى ايتىلدى. ايتا كەتەتىن جايت, كەيبىر كوشەلەرگە جەرگىلىكتى ازاماتتاردىڭ, ەڭبەگىمەن, ونەرىمىن تانىلعان جانداردىڭ ەسىمدەرى دە بەرىلدى.
ءسويتىپ, سولتۇستىكتىڭ سايىن دالاسىنداعى اۋىلدار مەن باسقا دا ەلدىمەكەندەرگە كوپتەن توسقان قازاقى اتاۋلار كەلىپ جاتىر. وبلىستىق ونوماستيكالىق كوميسسيانىڭ توراعاسى, وبلىس اكىمىنىڭ ورىنباسارى عالي نىعىمەتوۆ بۇل جۇمىستىڭ ءالى دە جالعاسا بەرەتىندىگىن ايتتى.
ەندى ەڭ باستى ماسەلە پەتروپاۆل قالاسىنىڭ وزىندە بولىپ تۇر. عاني ساقتاعان ۇلىنىڭ ايتۋىنا قاراعاندا قازىر مۇندا اتتارى اۋىستىرىلاتىن كوشەلەر تۋرالى تۇسىندىرمە جۇمىستارىن جۇرگىزەتىن, ەسىمدەرى كوشەلەرگە بەرىلەتىن تۇلعالاردى حالىققا تانىستىراتىن جۇمىس توبى قۇرىلماق. وسى توپ باق ارقىلى ورىس تىلىندە جاڭا اتاۋلاردىڭ كىمدەرگە, نە ءۇشىن بەرىلەتىندىگىن تۇسىندىرەتىن بولادى ەكەن. مىسالى, ۇلت كوسەمى, الاش باسشىسى ءاليحان بوكەيحانوۆ, مىرجاقىپ دۋلاتوۆ جانە ت.ب. تۋرالى تانىمدىق ماتەريالدار باق بەتىنە شىعاتىن بولادى. ەگەر بۇل جۇمىستار ساتىمەن جۇرسە ار جاعىندا ەڭ باستى اتاۋ – قىزىلجاردىڭ دا اۋىسۋى الىس بولا قويماس دەپ تىلەيمىز.
سولتۇستىك قازاقستان وبلىسى