قوستاناي وبلىسىنىڭ ءتارتىپ ساقشىلارى «ميگرانت» جەدەل الدىن الۋ شاراسىن وتكىزىپ جاتىر. باستى ماقسات - وبلىس اۋماعىندا جۇرۋگە رۇقسات قۇجاتىنىڭ مەرزىمى وتكەن شەتەلدىكتەردى انىقتاۋ, ولاردىڭ ۆيزالارى, جۇمىس رۇقساتتارىن تەكسەرۋ, دەپ حابارلايدى Egemen.kz.
جەدەل الدىن الۋ شاراسى بارىسىندا رۇقسات قۇجاتتارىنىڭ مەرزىمى ءوتىپ كەتكەن جانە زاڭسىز جۇمىس ىستەپ جۇرگەن 11 شەتەلدىك ازامات اكىمشىلىك جاۋاپكەرشىلىككە تارتىلدى. سونداي-اق 33 ازامات وزدەرىنە شەتەلدىكتەردىڭ كەلگەنى تۋرالى ۋاقتىلى حابارلاماعانى ءۇشىن اكىمشىلىك ايىپپۇل ارقالادى.
قوستاناي قالالىق پوليتسيا باسقارماسى كوشى-قون قىزمەتى مەن «دامۋ» قوعامدىق قورىنىڭ قىزمەتكەرلەرى ەلشىلىك ارقىلى وزبەكستان مەن تاجىكستاننان كەلگەن ەكى ازاماتتىڭ جەكە باسىن كۋالاندىراتىن قۇجاتتارىن قالپىنا كەلتىرۋگە كومەكتەسىپ, ولارعا وتانىنا قايتۋ ءۇشىن بيلەت ساتىپ الىپ بەردى.
«سونداي-اق, «ميگرانت» جەدەل الدىن الۋ شاراسى اياسىندا جىتىقارا جانە ناۋىرزىم اۋداندارىنىڭ كريمينالدىق پوليتسيا قىزمەتكەرلەرى ىزدەستىرىلىپ جاتقان ەكى قىلمىسكەردى ۇستادى», - دەدى وبلىستىق پد ءباسپاسوز قىزمەتىنىڭ مامانى كەنجە قونىسباي.
كوشى-قون ءتارتىبىن تەكسەرۋ شارالارى 19-اقپانعا دەيىن جالعاسادى.