بۇگىنگى كينو: قىتاي فيلمدەرى توپ جاردى

الەم بويىنشا العاشقى ورىندى 460 ميلليون دوللار جيناعان قىتايدىڭ «سەگىز ءجۇز» اتتى پاتريوتتىق ەكشن-فيلم يەلەنسە, ەكىنشى ورىننان كورىنگەن «مەنىڭ حالقىم, مەنىڭ وتانىم» (433,3 ملن) كينوتۋىندىسى دا قىتاي ءفيلمى. «تەنتەك جىگىتتەر» (Bad Boys for Life) ءفيلمى ءۇشىنشى ورىننان توبە كورسەتسە, كريستوفەر نولاننىڭ «ۇستانىم» (Tenet) ءفيلمى تىزىمدە ءتورتىنشى تۇر. ال العاشقى بەستىكتى قورتىندىلاپ تۇرعان «شەكسىز پو­يىز» (Kimetsu no Yaiba: Mugen Ressha-Hen) تولىقمەترلى انيمەسى جاپون كاسسالارىندا ايتۋلى رەكورد ورناتتى. سونىمەن قاتار «عاجايىپ ايەل:1984» ءۇمىتتى اقتاي المادى. گال گادوت امەريكا پروكاتىن كوروناۆيرۋس داعدارىسىنان الىپ شىعادى دەمەسەك تە, ءۇمىت كۇتكەندەر بولعان ەدى. پاندەميا باستالعالى بەرى «ۇستانىم» فيلمىنەن سوڭ كينوتەاتر­لاردا كورسەتىلگەن اتالعان ءفيلمنىڭ روجدەستۆو مەيرامى قارساڭىندا جا­رىققا شىققانىن تاعى ەسكەرىڭىز. دەمالىس ۋاعىندا 16,7 ملن دوللاردى قانجىعاسىنا بايلاعان كورسەتىلىمنىڭ قارقىنى جامان بولماعان-دى. بىراق قورتىندىلاي كەلگەندە كريستوفەر نولاننىڭ فانتاستيكالىق تريللەرىنىڭ شاڭىنا دا ىلەسە الماي قالدى. جالپى العاندا 40% كينوتەاترلار جۇمىس ىستەپ تۇرعان اقش پەن كانادادا «عاجايىپ ايەل» ءۇش اپتاعا جەتەر-جەتپەس ۋاقىتتا 32 ميلليون دوللار جيناپتى. ال بۇل ۋاقىتتا «ۇستانىم» ءفيلمى سولتۇستىك امەريكادا 57,9 ميلليون تابىس تاپتى. ايتسە دە «عاجايىپ ايەلدىڭ» رەيتينگى سىنشىلار اراسىندا 60 پايىزدى كورسەتىپ وتىر, PostTrak سەرۆيسىنىڭ ساۋالداماسى بويىنشا كورەرمەندەر فيلمگە «B +» دەپ ورتا باعا بەرگەن. «عاجايىپ ايەلدىڭ» امەريكادان تىس تولەمدەرى 100 ميلليون دوللارعا جەتەعابىل. گولليۆۋدتىڭ وزگە دە شىعارىلىمدارى سياقتى پەتي دجەنكينستىڭ ءفيلمى, 32,6 ميلليون دوللار تابىس تاپقان «جان» ءفيلمى قىتايدىڭ ءوزى تۇسىرگەن «قىزىل گۇل» (160 ملن دوللار) دراماسىنا جانە «تەگەۋرىندى تولقىن 2» (149 ملن دوللار) ەكشن ءفيلمىن باسىپ وزا الماعانى ەلەڭ ەتكىزەر جاڭالىق بولدى.

ال ەلدەگى فيلمدەر جايىندا ءسوز قوزعار بولساق, «جانىم, ايتسام, سەن­بەي­سىڭ» ءفيلمى – كوپ تالقىلانعان ءارى كو­رەرمەن تاراپىنان وڭ لەبىزگە يە بول­عان تۋىندى. 5 ناۋرىزدا پروكاتقا شىعىپ, ءبىر ايدان كەيىن كارانتين كەزىندە كينو­تەاترلاردىڭ جابىلۋىنا باي­لانىس­تى كورسەتىلىمى توقتاپ قالعان ەدى. فيلم 17-23 قازان ارالىعىندا رەسەي­دە وتكەن «كينوشوك» فەستيۆالىندە «ۇزدىك ستسەناري» نوميناتسياسىن, ۇزدىك تولىق­مەترلى فيلمگە بەرىلەتىن «زولوتايا لوزا» جۇلدەسىن, ءباسپاسوز ديپلومىن يەلەندى. ال قازاقستاندىق رەجيسسەر شاريپا ورازباەۆانىڭ ءوز قارجىسىنا تۇسىرگەن ء«ماريام» اتتى كوركەم ءفيل­مى دە كوپتىڭ نازارىنا ىلىككەن كار­تي­نالاردىڭ قاتارىندا. اتالعان كينوتۋىندى فرانتسيادا وتكەن XXVI ۆەزۋل كينو­فەستيۆالىندە باس جۇلدەگە يە بولعان ەدى, ايەل رەجيسسەردىڭ باس جۇلدە الۋى –فەستيۆالدىڭ 26 جىلدىق تاريحىنداعى العاشقى ايتۋلى جاعداي.

بۇگىنگى شاعىن شولۋىمىزدا ەل اۋزىنا ىلىككەن نەگىزگى فيلمدەردى قاپەرلەرىڭىزگە سالىپ وتۋگە تىرىس­تىق. كوروناۆيرۋس الەمدىك كينو يندۋستريا­سى ءۇشىن ۇلكەن سوققى بولىپ تيگەنى بەل­گىلى. ماماندار ەكىنشى دۇنيەجۇزىلىك سوعىس­تان كەيىن كينو سالاسىنىڭ مۇنداي داع­دارىسقا تۇڭعىش رەت ۇشىراعانىن ايتادى. توقىراۋعا ۇشىراعان كينوپروكات جانە كينوتەاترلار جەلىسى بار ءۇمىتىن 2021 جىلعا ارتىپ وتىر.