الماتىدا VII شاقىرىلعان قالالىق ءماسليحاتتىڭ ءبىرىنشى سەسسياسى ءوتتى

سايلاۋ قورىتىندىسى بويىنشا ماسليحاتتاعى ورىندار تومەندەگىدەي بەلگىلەنگەن:

Nur Otan پارتياسى - (68,11%) 29 ورىن, «اق جول» پارتياسى - (10,11%) 4 ورىن, قازاقستاننىڭ حالىق پارتياسى - (7,7) %) 3 ورىن, «اۋىل» پارتياسى - (7,68%) 3 ورىن.

سەسسيانى الماتى قالاسىنداعى اۋماقتىق سايلاۋ كوميسسياسىنىڭ ءتورايىمى جاننا اسانوۆا اشتى. ج. اسانوۆا سايلانعان دەپۋتاتتاردى قۇتتىقتاپ, حالىق قالاۋلىلارىنا VII شاقىرىلعان الماتى قالاسى ءماسليحاتى دەپۋتاتتارىنىڭ كۋالىكتەرى مەن توسبەلگىلەرىن تاپسىردى.

قالالىق ءماسليحاتتىڭ ءبىرىنشى سەسسياسىنىڭ توراعاسى سايلانعاننان سوڭ كۇن تارتىبىندەگى ءبىرىنشى ماسەلە رەتىندە VII شاقىرىلعان الماتى ءماسليحاتىنىڭ حاتشىسى بولىپ دەپۋتات ستانيسلاۆ كانكۋروۆ ءبىراۋىزدان سايلاندى. ەكىنشى ماسەلەنى تالقىلاۋ بارىسىندا تۇراقتى كوميسسيالار قۇرىلدى جانە ولاردىڭ توراعالارى مەن مۇشەلەرى سايلاندى. ءماسليحات دەپۋتاتتارى الدىندا سويلەگەن سوزىندە Nur Otan پارتياسى الماتى قالالىق فيليالىنىڭ توراعاسى, الماتى اكىمى باقىتجان ساعىنتاەۆ «الماتى-2050» ستراتەگياسىندا الماتىنىڭ عالامدىق, ءومىر ءسۇرۋ مەن جۇمىس ىستەۋ ءۇشىن تارتىمدى قالاعا ءارى ورتالىق ازيانىڭ زياتكەرلىك جانە مادەني استاناسىنا اينالۋى ءتيىس ەكەنى ناقتىلى كورسەتىلگەنىن اتاپ ءوتتى.

ستراتەگياعا سايكەس «شەتى جوق قالا», «اقىلدى» قالا, «تەڭ مۇمكىندىكتەر قالاسى», «قاۋىپسىز قالا», «جاسىل قالا», «جاھاندىق ىسكەرلىك ورتالىعى», «مادەني كرەاتۆيتى قالا» تۇجىرىمدامالارىنا باسا نازار اۋدارىلاتىن بولادى. ستراتەگيانى ءتيىمدى جۇزەگە اسىرۋ ءۇشىن كەلەسى تۇراقتى كوميسسيالار مەن ولاردىڭ باسشىلارى تانىستىرىلدى: ستراتەگيالىق جوسپارلاۋ, بيۋدجەت جانە تيىمدىلىك جونىندەگى كوميسسيا, باسشىسى – تاجىريبەلى قارجىگەر, «الماتى» اكك» اق باسقارما توراعاسى اسقار بىلىسبەكوۆ; كولىك جانە كوممۋنالدىق ينفراقۇرىلىمدى دامىتۋ جونىندەگى كوميسسيا, باسشىسى – تاجىريبەلى جول سالۋشى جانە كوممۋنالشى, «جول-ترانسسەرۆيس 2006» باس ديرەكتورى ەسەنگەلدى تالبيدينوۆ; قالا قۇرىلىسى, تۇرعىن ءۇي جانە جەردى پايدالانۋ جونىندەگى كوميسسيا, باسشىسى – تاجىريبەلى قۇرىلىسشى, «DWS group» كومپانياسىنىڭ ديرەكتورى ماكسيم فينوگەنوۆ; كاسىپكەرلىكتى, يننوۆاتسيانى, اقپاراتتىق تەحنولوگيالاردى جانە كرەاتيۆتى يندۋستريانى دامىتۋ جونىندەگى كوميسسيا, باسشىسى – تانىمال كاسىپكەر, «Tanmedia Group» ديرەكتورلار كەڭەسىنىڭ توراعاسى ارمانجان بايتاسوۆ; جەرگىلىكتى مەملەكەتتىك باسقارۋ جانە قاۋىپسىزدىك ماسەلەلەرى جونىندەگى كوميسسيا, باسشىسى – تاجىريبەلى مەملەكەتتىك قىزمەتكەر, الماتى قالاسىنىڭ الەۋمەتتىك ءال-اۋقات باسقارماسىنىڭ باسشىسى راحات شيماشەۆا; الەۋمەتتىك-مادەني دامۋ, جاستار جانە قوعامدىق كوممۋنيكاتسيالار جونىندەگى كوميسسيا, باسشىسى – تانىمال جاس ونەر قايراتكەرى, قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ.

قالا اكىمى ب.ساعىنتاەۆ «قالانىڭ ماڭىزدى ماسەلەلەرىنىڭ ءبىرى – ەكولوگيا سوندىقتان ەكولوگيا, تۋريزم جانە قوعامدىق كەڭىستىكتى دامىتۋ بويىنشا جاڭا كوميسسيانى قۇرىپ, ونىڭ باسشىسى ەتىپ ازاماتتىق سەكتوردىڭ تاجىريبەلى وكىلى التىناي ورمانقاليقىزى كوبەەۆانى تاعايىنداۋ كەرەك», - دەپ دەپۋتاتتارعا ۇسىنىس جاسادى. داۋىس بەرۋ ناتيجەسىندە تۇراقتى كوميسسيالاردىڭ جۇمىسىن قايتا فورماتتاۋ جانە جاڭا, جەتىنشىسىن قۇرۋ تۋرالى ۇسىنىستى VII شاقىرىلعان الماتى ءماسليحاتىنىڭ دەپۋتاتتارى ءبىراۋىزدان قولدادى. سەسسيا بارىسىندا «الماتى-2025» دامۋ باعدارلاماسى دا قابىلداندى. اياقتالۋ كەزىندە قالا ءماسليحاتى ەكىنشى سەسسياسىنىڭ توراعاسى سايلاندى.

الماتى