ۆولونتەرلار جىلىنىڭ ناتيجەسى بويىنشا نازارباەۆ زياتكەرلىك مەكتەپتەرىنىڭ وكىلدەرى بىردەن ءۇش نوميناتسيادا جەڭىمپاز اتاندى, دەپ حابارلايدى Egemen.kz.
جىلدىڭ رەسمي جابىلۋ سالتاناتىندا پرەزيدەنت قاسىم-جومارت توقاەۆ ەلىمىزدەگى ەرىكتىلەردىڭ ءرولىن ايرىقشا اتاپ ءوتتى. ءار وڭىردە «جىل ۆولونتەرى» حالىقارالىق سىيلىعىن وبلىس اكىمدەرى تابىستادى. بىردەن ءۇش نوميناڭيادا قاراعاندى, پەتروپاۆل جانە ورال قالالارىنداعى نازارباەۆ زياتكەرلىك مەكتەپتەرىنىڭ ەرىكتىلەر ۇيىمى جەڭىمپازدار قاتارىنان كورىندى.
وقۋشىلاردىڭ بويىندا رۋحاني جانە ادامگەرشىلىك قۇندىلىقتاردى دامىتۋعا باعىتتالعان «قوعامعا قىزمەت ەتۋ» الەۋمەتتىك جوباسى اياسىندا بەلسەندى قىزمەت ەتىپ جۇرگەن قاراعاندى قالاسىنداعى نازارباەۆ زياتكەرلىك مەكتەبىنىڭ «مەيىرىم كوپىرى» ەرىكتىلەر كلۋبى «ۇزدىك ۆولونتەرلىك ۇيىم» اتاعىنا لايىق دەپ تانىلدى.
– ءبىزدىڭ قىزمەتىمىزگە وسىنداي جوعارى باعا بەرگەنى – ەلىمىزدىڭ بەلسەندى جانە جاۋاپتى ازاماتتارىن تاربيەلەۋدەگى ماڭىزدى جۇمىستىڭ جەمىسى دەپ بىلەمىز, – دەيدى كلۋب جەتەكشىسى, پەداگوگ-ۇيىمداستىرۋشى-كۋراتور گۇلنارا سەيتوۆا.
«سالاۋاتتى ءومىر سالتىن ناسيحاتتاۋعا بەلسەندى قاتىسقانى ءۇشىن» اتالىمىنىڭ يەگەرى پەتروپاۆلدىق زياتكەر ينەسسا انارباەۆانىڭ ەرىكتىلىكپەن اينالىسقانىنا ءۇش جىل بولعان. كەڭپەيىل ينەسسا وتكەن جىلى ءوزىنىڭ تۋعان قالاسىندا «ادال» اتتى ۆولونتەرلىك كلۋبتىڭ نەگىزىن قالاپتى:
– بايقاۋ ءۇش كەزەڭنەن تۇردى. جەڭىمپازدار قاتارىنان كورىنگەنىمە قۋانىشتىمىن. ەرىكتىلىك قىزمەت – ءار ادام ءۇشىن ادال, مەيىرىمگە تولى مىندەت. بۇل ءبىزدىڭ ورتاق جەڭىسىمىز! قولداۋ بىلدىرگەندەرگە العىسىم شەكسىز, – دەدى قۋانىشىمەن بولىسكەن ينەسسا.
ورال قالاسىنداعى نازارباەۆ زياتكەرلىك مەكتەبىنىڭ كومانداسى «الەۋمەتتىك ماسەلەلەردى شەشۋگە قوسقان ۇلەسى ءۇشىن» نوميناتسياسى بويىنشا ۇزدىك اتاندى. ەرىكتىلەر ءتۇرلى شەبەرلىك ساعاتتار, قايىرىمدىلىق شارالار, جولداستىق كەزدەسۋلەر ۇيىمداستىرىپ ءجۇر. 68 اۋديوشىعارما دىبىستاندىرىلىپ, قازاق جانە اعىلشىن ءالىپبيى نەگىزىندە تاكتيلدى كىتاپ جاسالدى:
– الەۋمەتتىك شارالار بيىلعى جىلى ونلاين فورماتتا جالعاسۋدا. مەكتەپ وقۋشىلارى سويلەۋ جانە قيمىل-قوزعالىس قابىلەتى بۇزىلعان بالالارعا ارناپ قولدانبالى جانە وقۋ كىتاپتارى, بروشيۋرالار, سونداي-اق بەينەلەۋ قۇرالدارى مەن ونەر ساباعىندا جاسالعان ويىنشىقتاردىڭ كوللەكتسياسىن جيناۋدا, – دەيدى مەكتەپىشىلىك ء«بىز بىرگەمىز!» ۆولونتەرلەر كومانداسىنىڭ جەتەكشىسى, ءوزىن-ءوزى تانۋ ءپانىنىڭ مۇعالىمى اينۇر بابيكەنوۆا.
نازارباەۆ زياتكەرلىك مەكتەپتەرىنىڭ وقۋشىلارى ءۇشىن ەرىكتىلىك –قايىرىمدىلىقتىڭ ەڭ جاقسى ۇلتتىق داستۇرلەرىن جاڭعىرتۋ, مەيىرىمدىلىك پەن جاناشىرلىققا تاربيەلەۋ, ەلىمىزدىڭ جانە ءوز وڭىرلەرىنىڭ الەۋمەتتىك جانە مادەني ماسەلەلەرىن شەشۋگە اتسالىسۋ.