س. اسفەندياروۆ اتىنداعى قازۇمۋ-ءنىڭ جۇقپالى جانە تروپيكالىق اۋرۋلار كافەدراسىنىڭ پروفەسسورى راۆيليا ەگەمبەرديەۆا ونلاين-سۇحبات بارىسىندا كوروناۆيرۋستىڭ كوبەيۋى كوپ جاعدايدا پروفيلاكتيكالىق شارالاردىڭ ساقتالماۋى سالدارىنان بولادى دەپ اتاپ ءوتتى. ياعني, بۇقارالىق شارالار, الەۋمەتتىك اراقاشىقتىقتى ساقتاماۋ جانە بەتپەردە كيمەۋ اۋىر زارداپتارعا سوقتىرادى, دەپ حابارلايدى Egemen.kz.
الماتى كوروناۆيرۋستىڭ تارالۋ قارقىنى بويىنشا «سارى» ايماققا ەندى. ساراپشىلار ينفەكتسيانىڭ كۇرت ارتۋىن كارانتيندىك شارالاردىڭ بوساڭسۋىمەن بايلانىستىرادى.
«قىركۇيەك-قازان ايلارىندا كوروناۆيرۋستىق ينفەكتسيانىڭ قالادا تومەندەۋى تۇرعىنداردىڭ بوساڭسۋىنا ىقپال ەتتى. ساۋدا ورتالىقتارى مەن ساياباقتاردىڭ جۇمىستارىن قايتا جاڭعىرتۋى دەرتتىڭ كۇرت وسۋىنە اكەلدى. سونىمەن قاتار, سۋىق ءتۇسىپ, ۆيرۋستىڭ سىرتقى ورتادا ساقتالۋى مۇمكىن بولدى, ال بۇل جاعدايدى كۇردەلەندىرە تۇسەدى», - دەدى ر. ەگەمبەرديەۆا.
ساراپشىلاردىڭ باقىلاۋى بويىنشا, جۇرتتىڭ باسىم بولىگى ءالى كۇنگە دەيىن كوروناۆيرۋستىڭ بار ەكەنىنە سەنبەيدى, سونىڭ سالدارىنان پروفيلاكتيكالىق شارالاردى ەلەمەيدى. كەيبىرەۋلەر ءتىپتى دارىگەرلەر ساندار مەن دەرەكتەردى اسىرىپ كورسەتەدى دەگەن سەنىمدە.
«بىراق, وكىنىشكە وراي, كوروناۆيرۋستىق ينفەكتسيا بار جانە ونىڭ زاردابى وتە اۋىر. سونىمەن قاتار, بۇل دەرتتى جۇقتىرعان كەز-كەلگەن ادامدا اۋرۋ اسقىنۋى مۇمكىن. احۋالدىڭ كۇردەلى ەكەنىن تۇسىنگەندە عانا ادامداردىڭ الەۋمەتتىك جاۋاپكەرشىلىگى ارتاتىن بولادى», - دەپ ەسەپتەيدى سپيكەر.
ر. ەگەمبەرديەۆانىڭ ايتۋىنشا, سوزىلمالى اۋرۋلارى بار قارت ادامدار اۋرۋحانالارعا ءجيى تۇسەدى.
«نەگىزىنەن ناۋقاستار ۇيدەن شىقپادىق دەيدى. ال, ولارعا ساقتىق شارالارىن ەلەمەگەن وتباسىنىڭ جاۋاپسىز مۇشەلەرى مەن تۋىستارى ينفەكتسيا جۇقتىرادى. ارينە, قارت ادامدار اۋرۋعا توتەپ بەرە الماي, قايتىس بولۋلارى ابدەن مۇمكىن», - دەدى سپيكەر.
ر. ەگەمبەرديەۆا بۇگىنگى كۇنى دە پروفيلاكتيكالىق شارالاردى قاتاڭ ساقتاۋ كوروناۆيرۋسقا قاتىستى ۇسىنىستاردىڭ ەڭ ماڭىزدىسى ەكەنىن اتاپ ءوتتى. ولار: بەتپەردە تاعۋ, قولعاپ كيۋ, دەزينفەكتسيا قۇرالدارىن قولدانۋ. جابىق كەڭىستىكتە الەۋمەتتىك قاۋىپسىز اراقاشىقتىقتى ساقتاۋ, ادامدار كوپ جينالاتىن ورىنداردان اۋلاق بولۋ.