قازاقستاندىق Nomad Stunts توبى الەمدىك كاسكادەرلەر اكادەمياسىنىڭ «تاۋرۋس» سىيلىعىن جەڭىپ الدى. بۇل سىيلىق قازاقستاندىق كاسكادەرلەرگە رەجيسسەر اقان ساتاەۆتىڭ «توميريس» تاريحي دراماسىنداعى تريۋكتەرى ءۇشىن بەرىلگەن.
قازاقستاننىڭ ەڭبەك سىڭىرگەن قايراتكەرى, كاسكادەر جايداربەك كۇنعوجينوۆ 2000 جىلى ءوزى ۇيىمداستىرعان حالىقارالىق كاسىبي Nomad Stunts كاسكادەرلەر كومانداسىنا الەمنىڭ ۇزدىك ەكشن-ماماندارىنا بەرىلەتىن «تاۋرۋستىڭ» بۇيىرعانىن زور ماقتانىشپەن ءارى ۇلتتىق كينو تاريحىنداعى ۇلكەن جەتىستىك دەپ اتاپ ءوتتى. جايداربەك كۇنعوجينوۆتىڭ ايتۋىنشا, «توميريس» – Nomad Stunts ءۇشىن ماڭىزدى جوبالاردىڭ ءبىرى. بۇل فيلمدە باتىس ستاندارتتارى بويىنشا جۇمىس ىستەگەن توپقا ەكشن, اكتەرلەردى ىرىكتەۋ, دايىندىق جۇمىستارىنا ۋاقىت جەتكىلىكتى بولعان. توپ مۇشەلەرى وسى جوباعا ۇسىنىس جاساعان رەجيسسەر ا.ساتاەۆقا العىسىن بىلدىرە وتىرىپ, وزدەرى ورىنداعان تريۋكتەردىڭ باسىم كوپشىلىگى ءفيلمنىڭ العاشقى كورسەتىلىمىنە شىعارىلعاندىعىن اتاپ ءوتتى.
جىل سايىن الەمنىڭ ۇزدىك كاسكادەرلەرىن, قويۋشى جانە ەكشن مامانداردى ساراپتايتىن «تاۋرۋس» جۇلدەسىنىڭ ماراپاتتاۋ ءراسىمى لوس-اندجەلەستە Paramount ستۋدياسىندا ونلاين رەجىمدە ءوتتى. بۇگىندە الەمنىڭ ەڭ ءىرى كينو جوبالارىنا قاتىسىپ جۇرگەن Nomad Stunts اتالعان جۇلدەگە ەكى مارتە ۇمىتكەر بولعانى بەلگىلى. 2017 جىلى «ۆيكينگ» فيلمىندەگى تريۋكتەرى ءۇشىن وسى ماراپاتقا ۇسىنىلعانمەن, جەڭىس قازاقستاندىق توپقا بۇيىرماعان بولاتىن.
«وسكار» دەپ تە اتالاتىن سىيلىققا ۇمىتكەرلەردىڭ قاتارىندا «كاپيتان مارۆەل», «دجون ۋيك 3», «فورساج: حوببس جانە شوۋ» باسقا دا فيلمدەردەگى كاسكادەرلەر قاتىستى. «شەتەل فيلمىندەگى ۇزدىك تريۋكتەر» اتالىمىندا Nomad Stunts توبى «لەنينگرادتى ازات ەتۋ» (رەسەي), «زاحار بەركۋت» (ۋكراينا), «كاسابلانكا» (ەگيپەت) جانە ء«ريمنىڭ ءبىرىنشى پاتشاسى» (يتاليا) فيلمدەرىندەگى ارىپتەستەرىمەن باق سىناسقان بولاتىن.
Nomad Stunts توبىنىڭ وسىنداي ۇزدىك جوبالارىنىڭ ءبىرى وسى جىلدىڭ تامىز ايىندا پروكاتقا شىققان Disney ستۋدياسىنىڭ «مۋلان» ءفيلمى. ولار ات ۇستىندەگى بارلىق كۇردەلى تريۋكتەردى ورىنداپ, جايداربەك كۇنعوجينوۆ ەپيزودتىق رولگە ءتۇستى. وسى جولى Nomad Stunts توبى Disney كومپانياسىمەن جۇمىس ىستەگەن العاشقى قازاقستاندىق كاسكادەرلەر دەسەك, توپ جەتەكشىسى جايداربەك كۇنعوجينوۆ گولليۆۋدتىڭ ەڭ ءىرى ستۋديالارى جوباسىندا ءرول العان العاشقى قازاقستاندىق اكتەر.
بۇگىندە قازاقستاننىڭ ەڭ تانىمال كاسكادەرلەر توبى اقان ساتاەۆ, تيمۋر بەكمامبەتوۆ, سەرگەي بودروۆ جانە قازاقستاندا كينو ءتۇسىرىپ جۇرگەن باسقا دا رەجيسسەرلەرمەن, سونىمەن بىرگە سيلۆەستەر ستاللونە, ارنولد شۆارتسەنەگگەر, بريۋس ۋيلليس, دجەت لي, كيانۋ ريۆز, ناتالي پورتمان جانە باسقا دا گولليۆۋد جۇلدىزدارمەن ءىرى جوبالارعا قاتىسىپ كەلەدى. جايداربەك كۇنعوجينوۆ توبىنىڭ جۇمىسى گولليۆۋدتان بولليۆۋدقا دەيىنگى جوبالاردا بەدەلدى توپتاردىڭ بىرەگەيى. سونىمەن بىرگە امەريكا, ەۋروپا, وڭتۇستىك-شىعىس ازيا ەلدەرى جانە قىتايدا, تۇركيا, رەسەي مەن مالايزيادا امەريكانىڭ «ماركو پولو» سەريالىنىڭ تۇسىرىلىمىنە دە قاتىسقان. ولار ءىرى جوبالارمەن قاتار Netflix جانە HBO قىزمەتتەرىنە ارنالعان جوبالاردا دا جۇمىس ىستەيدى.
الماتى