سقو اققايىڭ اۋدانىنىندا تۇراتىن 45 جاستاعى ايەلدە وسى كۇنگە دەيىن تەك تۋى تۋرالى كۋالىك قانا بولعان. ۋچاسكەلىك ينسپەكتور بۇل فاكتىنى انىقتاپ, وعان كوشى-قون قىزمەتىنە جۇگىنۋ ءتارتىبىن تۇسىندىرگەن, دەپ حابارلايدى Egemen.kz.
پوليتسەيلەر جاعدايعا تۇسىنىستىكپەن قاراپ, ايەلگە قۇجات الۋعا جاردەمدەسكەن. جەكە تۇلعاسىن راستاۋ بويىنشا قاجەتتى سۇراۋ سالۋلار جاسالعان. ەكى ايدان سوڭ ول اۋداندىق پوليتسيا ءبولىمىنىڭ باستىعى, پوليتسيا مايورى رۋسلان ساپاروۆتىڭ قولىنان كوپتەن كۇتكەن قۇجاتىن الدى. قازىرگى تاڭدا ول اۋدانداعى شارۋاشىلىقتاردىڭ بىرىنە جۇمىسقا ورنالاسقان.
"ۋچاسكە" جەدەل-پروفيلاكتيكالىق ءىس-شاراسى اياسىندا اۋداندا قۇجاتسىز تۇراتىن ادامداردى انىقتاۋ بويىنشا جۇمىس كۇشەيتىلدى. كوشى-قون قىزمەتىنىڭ قىزمەتكەرلەرى ۋچاسكەلىك پوليتسيا ينسپەكتورلارىمەن اۋلا بويى تەكسەرىس جۇرگىزەدى. قۇجاتى جوق ءاربىر ادامنىڭ باسىندا ءتۇرلى ومىرلىك جاعداي بولادى, ءبىزدىڭ مىندەتىمىز اۋداننىڭ ءار تۇرعىنىنا كومەك كورسەتۋ", - دەيدى رۋسلان ساپاروۆ.
مۇنداي جۇمىستى پوليتسەيلەر بارلىق اۋداندار مەن وبلىس ورتالىعىندا جۇرگىزەدى. "ۋچاسكە" جپش باستالعاننان بەرى سقو-دا رەتتەلمەگەن قۇقىقتىق مارتەبەسى بار 162 ادام انىقتالدى. ءار جاعداي بويىنشا قۇجاتتاندىرۋدا كومەك كورسەتۋ جونىندە جۇمىس جۇرگىزىلەدى.
سولتۇستىك قازاقستان وبلىسى