بۇگىن قر ءىىم كولىكتەگى پوليتسيا دەپارتامەنتىنىڭ باسشىسى وڭال بەكەەۆتىڭ توراعالىعىمەن كەڭەيتىلگەن كەڭەس ءوتتى. وندا دەپارتامەنتتىڭ 2020 جىلعى 9 ايداعى جەدەل-قىزمەتتىك جۇمىسىنىڭ قورىتىندىلارى قارالىپ, كولىك پوليتسياسىنىڭ الداعى كەزەڭگە ارنالعان نەگىزگى مىندەتتەرى ايقىندالدى. باسقوسۋعا دەپارتامەنت اپپاراتىنىڭ قىزمەت باستىقتارى مەن اۋماقتىق ءبولىنىس باسشىلارى قاتىستى, دەپ حابارلايدى Egemen.kz كولىكتەگى پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
كەڭەستى اشقان و. بەكەەۆ ەلىمىزدىڭ تەمىرجول جانە اۋە كولىگى نىساندارىنداعى جەدەل جاعدايعا جان-جاقتى توقتالدى.
ونىڭ ايتۋىنشا, اعىمداعى جىلدىڭ باسىنان بەرى كولىك پوليتسەيلەرى اۋە جانە تەمىرجول كولىگىمەن تاسىمالدانعان 15 ميلليوننان استام ازاماتتىڭ قاۋىپسىزدىگىن قامتاماسىز ەتكەن.
ءوز سوزىندە ۆەدومستۆو باسشىسى قابىلدانعان الدىن الۋ شارالارىنىڭ ناتيجەسىندە قىلمىستار سانىن 27,1%-عا تومەندەتۋگە قول جەتكىزىلگەنىن اتاپ ءوتتى. وسى جىلدىڭ 9 ايىندا بارلىعى 1159 قىلمىستىق قۇقىق بۇزۋشىلىق تىركەلدى. ولاردىڭ جالپى اشىلۋى 91%-دى قۇرادى.
ءتۇرلى قۇقىق بۇزۋشىلىقتارى ءۇشىن 32498 ازامات اكىمشىلىك جاۋاپكەرشىلىككە تارتىلدى. سونداي-اق ەسىرتكىنىڭ زاڭسىز تارالۋ فاكتىلەرىن انىقتاۋعا جانە جولىن كەسۋگە باعىتتالعان شارالار ىسكە اسىرىلدى. دەپارتامەنت بولىنىستەرىنىڭ كۇشىمەن 155 كيلوگرامنان اسا ءارتۇرلى ەسىرتكى زاتتارى تاركىلەندى.
كەڭەس بارىسىندا ەل پرەزيدەنتى ق.ك. توقاەۆتىڭ قازاقستان حالقىنا جولداۋىن ىسكە اسىرۋ, سونىڭ ىشىندە ىشكى ىستەر ورگاندارىن رەفورمالاۋ, "حالىق ۇنىنە قۇلاق اساتىن مەملەكەت" تۇجىرىمداماسى اياسىندا پوليتسيا جۇمىسىنىڭ اشىقتىعى مەن ايقىندىعىن قامتاماسىز ەتۋ جونىندەگى ماسەلەلەر كەڭىنەن تالقىلاندى.
"مەملەكەتتىڭ تۇراقتىلىعىن جانە قوعامنىڭ بەرەكە-بىرلىگىن ساقتاۋ – باستى مىندەت. وسىنداي ساتتە پوليتسيا قىزمەتكەرلەرىنىڭ كاسىبي دەڭگەيىنە, وتانشىلدىق رۋحىنا, قاجىر-قايراتىنا كوپ نارسە بايلانىستى", - دەدى پرەزيدەنت ق.ك. توقاەۆ ءىىم-ءنىڭ كەڭەيتىلگەن القا وتىرىسىندا.
"بۇل مەملەكەت باسشىسىنىڭ ناقتى تاپسىرماسى. بىرىنشىدەن, پوليتسيادا تەك كاسىبي ماماندار قىزمەت ەتۋى قاجەت. ەكىنشىدەن, بولاشاق پوليتسيا قىزمەتكەرىنىڭ جوعارى مورالدىق قاسيەتتەرى, ادال, ادەپتى جانە فيزيكالىق دايىندىعى دا شىڭدالعان بولۋى قاجەت. ول قانداي ماڭىزدى لاۋازىمدا قىزمەت اتقاراتىنىن جانە قانشالىقتى جاۋاپتى ەكەنىن تولىققاندى ءتۇسىنۋى قاجەت", - دەدى پوليتسيا پولكوۆنيگى.
بۇدان سوڭ بىرقاتار اۋماقتىق ءبولىنىس باسشىسىنىڭ باياندامالارى تىڭدالدى.
شارا بارىسىندا كادر ساياساتىنا باسا نازار اۋدارىلدى. سونىمەن قاتار پوليتسەيلەردىڭ قىزمەتتىك-جاۋىنگەرلىك دايىندىق دەڭگەيىن كوتەرۋ جانە جەكە قۇرام اراسىنداعى ءتارتىپتى نىعايتۋ ماسەلەلەرى ايتىلدى.
و. بەكەەۆ كەڭەستى قورىتىندىلاي كەلە, ءبولىنىس باسشىلارىنا جەدەل قىزمەتتى كۇشەيتۋ, قىلمىستاردى ءىزىن سۋىتپاي اشۋ, قۇقىقبۇزۋشىلىقتاردىڭ الدىن الۋ, ادامدار كوپ شوعىرلاناتىن تەمىر جول قوزعالىسىندا, اۋەجاي نىساندارىندا, ۆوكزالدار مەن پەررونداردا قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ بويىنشا بىرقاتار مىندەتتەر قويدى.