مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا ازاماتتاردىڭ سۇرانىستارىنا ىقىلاس تانىتۋعا ءتيىس قۇقىق قورعاۋ ورگاندارىنىڭ الدىنا جاڭا تالاپتار قويىلىپ وتىرعاندىعىن ايتقان ەدى.
سونىمەن قاتار پرەزيدەنت «قۇقىق قورعاۋ جۇيەسىنىڭ جۇمىسىندا بۇرىنعى داعدى بويىنشا ايىپتاۋعا بەيىمدىلىك باسىمداۋ بولىپ تۇر. ازاماتتاردىڭ قىلمىستىق جاۋاپكەرشىلىككە نەگىزسىز تارتىلاتىن جاعدايلارى دا از كەزدەسپەيدى» دەگەن بولاتىن. جولداۋدا ايتىلعان وسى تۇجىرىمعا ارنايى توقتالۋىمىزدىڭ وزىندىك سەبەبى بار.
«ەگەمەن قازاقستان» گازەتىنىڭ رەداكتسياسىنا ىشكى ىستەر مينيسترلىگى قىلمىستىق اتقارۋ جۇيەسى كوميتەتىنىڭ «ەتس-166/1 مەكەمەسىندە» جازاسىن وتەپ جاتقان پاۆەل گەنادەۆيچ ترۋفانوۆتان حات كەلگەن ەدى. وندا پاۆەل ترۋفانوۆ ءوزىنىڭ ادىلەتسىز سوتتالعاندىعىن, وزىنە قاتىستى قىلمىستىق ءىس بويىنشا نۇر-سۇلتان قالاسى «سارىارقا» اۋداندىق پوليتسيا باسقارماسى تاراپىنان بىرقاتار قۇقىقبۇزۋشىلىق بولعانىن, ءارتۇرلى مەملەكەتتىك ورگاندارعا شاعىم تۇسىرگەنىمەن, ءىستىڭ ناتيجەسىز اياقتالعانىن جازادى.
«مۇلدە قاتىسىم جوق ۇرلىققا قاتىستى ەكى فاكتىنى ماعان تاڭىپ وتىر. اتالعان ۇرلىقتارعا مەنىڭ قاتىستىلىعىم تۋرالى فاكتى دالەلدەنبەدى. بىراق سوت مۇنى ەسكەرگەن جوق. ال ءۇش ادامنان تۇراتىن جابىرلەنۋشى تاراپتىڭ دا ماعان قويار تالابى جوق, ويتكەنى مورالدىق تا, ماتەريالدىق تا شىعىنى تولىقتاي وتەلگەن. قىلمىستىق قۇقىقبۇزۋشىلىق بويىنشا تالاپ-ارىز جوق. ءيا, مەن قىلمىستىق تەرىس ارەكەت جاسادىم, ول ءۇشىن وكىنەمىن. ەكى كىشكەنتاي بالام بار ەكەنىنە قاراماستان, سوت مەنىڭ جازامدى ءتورت جىلعا قاۋىپسىزدىگى بارىنشا جوعارى جازالاۋ ورنىندا وتەۋگە ۇكىم شىعاردى» دەپ جازادى جازاسىن وتەۋشى.
پاۆەل ترۋفانوۆ شاعىمىندا وزىنە قاتىستى قىلمىستىڭ جەڭىل جازا تۇرىنە جاتاتىندىعىن, ءالى دە ادىلەتتىلىككە ءۇمىت ارتاتىندىعىن, سونداي-اق تىكەلەي وزىنە قاتىستى ۇرلىق مولشەرى 189 200 تەڭگە كولەمىندە تولىقتاي وتەلگەنىن جازادى.
جازاسىن وتەۋشىنىڭ جانايقايىن قۇقىق قورعاۋ ورگاندارىنىڭ نازارىنا ۇسىنا وتىرىپ, پاۆەل ترۋفانوۆتىڭ قىلمىستىق ىسىنە ادىلەتتى شەشىم شىعارىلادى دەپ ۇمىتتەنەمىز.