پەتروپاۆل قالاسىنىڭ پوليتسيا باسقارماسىندا 18 كريميناليست جۇمىس ىستەيدى. ولار قىلمىس ورنىندا قالعان ساۋساق, اياق كيىم, كولىك, بۇزۋ قۇرالدارىنىڭ بيولوگيالىق ىزدەرىن الىپ, دالەلدەمەلەر بازاسىن تولىقتىرىپ قىلمىسكەردىڭ جاۋاپقا تارتىلۋىنا مۇمكىندىك تۋدىرادى. جىل باسىنان بەرى كريميناليستەر وقيعا ورىندارىن قاراۋعا 1200 رەت قاتىسىپ, 2600-دەن استام كريميناليستيكالىق زەرتتەۋلەر جۇرگىزگەن. سونىڭ ناتيجەسىندە 95 كۇدىكتى انىقتالىپ, جابىرلەنۋشىلەر جانە كۋاگەرلەرمەن "وبراز++" بازاسى بويىنشا 100-دەن اسا ادام تانىلدى, - دەپ حابارلايدى Egemen.kz.
جەدەل-كريميناليستيكالىق ءبولىمنىڭ باستىعى, پوليتسيا مايورى تيمۋر ءابدىلمانوۆتىڭ ايتۋىنا قاراعاندا كريميناليستەردىڭ باسىم بولىگى - جاستار, ورتاشا جاسى – 23-28 ارالىعىندا. ولار جەدەل-تەرگەۋ توپتارى قۇرامىندا جۇمىس ىستەپ, قىلمىس ورىندارىن تەكسەرەدى, زاتتاي دالەلدەمەلەرمەن جۇمىس جۇرگىزەدى. كريميناليستەرگە لوگيكالىق ويلاۋ, جاقسى ەستە ساقتاۋ قابىلەتى, مۇقيات نازار سالۋ, ۇقىپتىلىق, شىدامدىلىق, تەحنيكالىق قۇرالداردى يگەرۋگە دەگەن ۇمتىلىس كەرەك. "ماسەلەن, كوكتەمدە چەليۋسكين كوشەسىندەگى جەر ۇيدە ۇرلىق جاسالدى. كۇدىكتى ء"ىزىن سۋىتپاي" ۇستالدى, الايدا, ول ءوزىنىڭ قىلمىسقا قاتىستىلىعىن مويىنداعان جوق. الايدا كريميناليستەر انىقتاعان تەرەزە جاقتاۋىنداعى ساۋساق ىزدەرى ونى بۇلتارتپادى", دەيدى ول.
جالپى ايتقاندا كريميناليستەر نەگىزىنەن جەتى ءتۇرلى زەرتتەۋ جۇرگىزەدى: داكتيلوسكوپيالىق (ساۋساق ىزدەرى بويىنشا), تراسولوگيالىق (اياق كيىم, شينا, بۇزۋ قۇرالدارىنىڭ ىزدەرى), سۋىق قارۋدى زەرتتەۋ, بالليستيكالىق, جازۋدى تانۋ, قۇجاتتاردىڭ تەحنيكالىق زەرتتەۋى, سوت-پورترەتتىك ساراپتاما. مۇنىمەن قوسا قىزمەتكەرلەر ساۋساق ىزدەرى, پورترەتتەرمەن جۇمىس ىستەۋدى جىلدامداتاتىن "وبراز++" جانە "پاپيلون" اقپاراتتىق-ىزدەۋ جۇيەلەرىمەن جۇمىس ىستەيدى.