جازدىڭ ءبىر جارامسىز قىلىعى - موتوتسيكلشىلەردىڭ تۇنگى سەرۋەنى. پەتروپاۆلدىڭ ەڭ ۇلكەن كوشەلەرىنىڭ ءبىرى – جامبىل داڭعىلىندا تۇنگى سەرىلەر جارىس ۇيىمداستىرىپ, ۇيقىداعى تۇرعىنداردىڭ مازاسىن الىپ جاتقانى تۋرالى جەرگىلىكتى الەۋمەتتىك جەلىلەر جارىسا جازۋدا, - دەپ حابارلايدى Egemen.kz.
وسىنى تيۋ ءۇشىن پوليتسيا داڭعىلدىڭ بويىنا تۇنگى ۋاقىتتا موتوتسيكلدەردىڭ قوزعالىسىنا تىيىم سالاتىن بەلگىلەر ورناتۋعا ءماجبۇر بولدى. بارلىعى 22 جول بەلگىسى ورناتىلىپ, ايتەۋىر تىنىشتىق ورنادى.
تۇنگى جارىس پەتروپاۆلدىق ەسەر جاستاردىڭ جىلدان جىلعا جالعاسىپ كەلە جاتقان جاعىمسىز ەرمەگى. ءبىر كەزدە وبلىس باسشىلارى مۇنى قويدىرۋ ءۇشىن, ءبارىبىر ۇشاقتاردىڭ تۇندە كەلمەيتىنىن پايدالانىپ اۋەجايدىڭ جولىنا ارنايى جارىق بەرگىزىپ, تۇنگى اۆتو مەن موتوجارىستار قالانىڭ سىرتىنداعى سول جولدىڭ بويىندا بولعان ەدى. الايدا وزدەرىنە ەركىن تيگەن جولدا سەرىلەر ساۋ جارىسپاي, ماس بولىپ جارىسىپ, اقىرى ءبىر-ەكى اپات بولعان سوڭ ول دا تيىلعان ەدى.
تۇنگى سەرىلەردىڭ جۇيتكيتىن جولدارىنىڭ ءبىرى قازىر پەتروپاۆل مەن بەسكول سەلوسىنىڭ اراسى بولىپتى. وسى سوڭعىلاردىڭ شاعىمىمەن جۋىردا سقو پد پاترۋلدىك پوليتسيا باتالونى ەكيپاجىنىڭ قاتىسۋىمەن تۇنگى رەيد وتكىزىلدى. قۇقىق قورعاۋ قىزمەتكەرلەرى جىلدام ءجۇرىستى ەرمەك قىلاتىن موتوتسيكلشىلەردى قىزىقتىراتىن بەسكول اۋلى ماڭىمەن وتەتىن تاس جولدى باقىلاۋعا الدى. بۇل ءتۇنى قۇقىق بۇزۋشىلىقتار انىقتالمادى. "الداعى ۋاقىتتا دا بۇل اۋدان ورتالىعى اۆتوپاترۋلدەردىڭ ءجىتى باقىلاۋىندا بولادى. پاترۋلدىك پوليتسيانىڭ جەكە قۇرامى موتوتسيكل جۇرگىزۋشىلەرى تاراپىنان بولاتىن قۇقىق بۇزۋشىلىقتاردى انىقتاۋعا تۇراقتى تۇردە باعدارلاندى. موتوتسيكلشىلەردىڭ اراسىندا ەڭ كوپ تارالعان قۇقىق بۇزۋشىلىقتار – زاڭسىز قايتا جابدىقتاۋ, مانەۆر جاساۋ ەرەجەلەرىن بۇزۋ. ەڭ قاۋىپتى بۇزۋشىلىقتاردىڭ قاتارىنا جىلدامدىقتى اسىرۋ جانە جولدىڭ قارسى جولاعىنا شىعۋ جاتادى. تۇرعىندار تۇنگى شۋعا كوپتەپ شاعىمدانادى", - دەيدى سقو پد جەرگىلىكتى پوليتسيا قىزمەتى باسقارماسىنىڭ باستىعى پوليتسيا پودپولكوۆنيگى ايدىن بايماتوۆ.
پوليتسيا قىزمەتكەرلەرى تۇنگى ساعات 23-تەن تاڭعى 6-عا دەيىن ۋاقىتتاعى شۋ ءۇشىن اكىمشىلىك قۇقىق بۇزۋشىلىق كودەكستىڭ 437-بابى "تىنىشتىقتى بۇزۋ" بويىنشا بەس اەك مولشەرىندە ايىپپۇل سالىناتىندىعىن ەسكەرتەدى. اتالعان باپ بويىنشا سولتۇستىك قازاقستان وبلىسىنىڭ پوليتسيا قىزمەتكەرلەرىمەن ازىرگە 1308 اكىمشىلىك حاتتاما تولتىرعان.
سولتۇستىك قازاقستان وبلىسى