توكيو وليمپياداسىنا باراتىن وتاندىق بوكسشىلاردىڭ ليتسەنزياسى تۇگەلدەندى. ەندى الاڭسىز دايىندالۋعا بولادى. ەرنازاردىڭ سەگىزى بولەك تە, ەر توستىگى بولەك دەمەكشى, ەرلەر اراسىندا بوكستان سەگىز سالماق بولعانىمەن, ونىڭ ىشىندە سالماقتىڭ دا سالماعى بار. قازاق بوكسىنداعى ەر توستىكتەردىڭ وتكەن وليمپيادالارداعى ويىن ورنەگىنە كوز جۇگىرتكەن ەدىك...
وسىدان 16 جىل بۇرىنعى وليمپيادا قۇددى الىپتار ايقاسى ىسپەتتى. رەسەيلىك كوممەنتاتور قازاق بوكسشىسىنان گورى قارسىلاسىنا بۇرا تارتاتىن ءتارىزدى. ونىڭ دا وزىندىك سىرى بار, جارتىلاي فينالدا ءبىزدىڭ بوكسشى رەسەيلىك بىلعارى قولعاپ شەبەرىنىڭ اتاق-داڭقىنان قايمىقپاي, شەبەرلىگىن تانىتتى. الاشتىڭ ورەنى ولەگ سايتوۆتى وليمپيادانىڭ ءۇش دۇركىن چەمپيونى بولۋ مۇمكىندىگىنەن ايىردى...
افيناعا بەيمالىم بوكسشى ساناتىندا اتتانعان وعىلاننىڭ جەلى وڭىنان تۇردى. باقتيار كۋبالىق لورەنتسو اراگونعا اقتىق كەزدەسۋدە باس كوتەرتپەدى. ستيۆەنسوننىڭ ءىزباسارى قانشا جەردەن ەكىلەنىپ العا ۇمتىلعانىمەن, قارسىلاسىنىڭ قاۋقارلى سوققىسىنا قارسى قايرات ەتە المادى. ارتاەۆتىڭ اسىعى الشىسىنان ءتۇستى. التىن مەدال قازاقستان قورجىنىندا! وعان قوسا وليمپيادانىڭ ەڭ ۇزدىك بوكسشىسىنا بەرىلەتىن ۆەل باركەر كۋبوگىن يەلەنگەنى تاعى بار! بۇل – 2004 جىلى ەجەلگى ەللادا ەلىندە وتكەن وليمپيا ويىندارى ەدى....
2008 جىل. بەيجىڭ وليمپياداسى. فينالدىق جەكپە-جەك. رينگتىڭ قارسى بۇرىشىندا كۋبانىڭ ۇكىلەگەن ءۇمىتى. ءبىزدىڭ جىگىت سەريالى سوققىلار جاسايدى. كۋبالىق كارلوس بانتەۋر سوققىسى اۋا قارماپ جاتىر, قارسىلاسى وڭ جاعىنا ءبىر, سول جاعىنا ءبىر جالت-جۇلت ەتىپ شىعا كەلەدى.
ءتورت راۋند بويى كارلوس ابدەن دىڭكەلەدى. جىلدار بويىنا شەگىنە جەتكەن ءتوزىم تيەگى اعىتىلىپ, بۇگىن كۋبالىق بوكسشىعا سوققى بولىپ جاۋىپ جاتقانداي. قازاق بوكسشىسى سوققىنى ءۇستى-ۇستىنە توپەلەي تۇسەدى. ەسەپ 18:9 باقىتتىڭ بەنەفيسى ەدى بۇل. بەيجىڭدە سارسەكباەۆ تەڭدەسسىز بوكسشى ەكەنىن دالەلدەپ, قازاق ءانۇرانى كوكتە قالىقتادى!
قانشا مىقتى بولساڭ دا, جارىس ءوتىپ جاتقان ەلدىڭ ورەنىمەن سايىسقا تۇسكەندە «قالاي بولار ەكەن؟» دەگەن كۇمان-كۇدىكتىڭ بويىڭدى بيلەيتىنى بار. 2012 جىلى لوندوندا دا ءدال سونداي كۇيدە بولدىق. اقتىق سىندا ءبىزدىڭ بوكسشىنىڭ ءشوبى فرەددي ەۆانسقا ءتۇسۋىن نەگە جورىرىمىزدى بىلمەدىك. «تاۋەكەل! الىپ شىعادى!».
«فرەددي» دەگەن داۋىس زالدا جاڭعىرىپ تۇردى. قارسىلاستىڭ مىسىن باساتىنداي قالىڭ جۇرت. بىراق سەرىك ساپيەۆ وزىنە نىق سەنىمدى. وڭ قولىمەن قارسىلاسىن تۇرتكىلەيدى دە, سول قولىمەن سوققى جاسايدى. اياعىمەن ەركىن قيمىلداپ, رينگتىڭ ورتاسىن ويقاستاپ ءجۇر.
باستان-اياق باستى رولدە ويناعان ءبىزدىڭ وعىلان ەۆانسقا ەش مۇمكىندىك بەرگەن جوق. شابۋىلدى سايىستىڭ سوڭىنا دەيىن استە باسەڭدەتپەدى. اعىلشىن بوكسشىسى قورعانۋمەن الەك. جەڭىستى ج ۇلىپ الۋ دەگەن وسى بولار. ناعىز جەڭىمپاز. تۇماندى البيون التىن تۇعىرعا كوتەرىلگەن سەرىك سىندى الاشتىڭ ايبىندى ۇلىنا قول سوقتى. وسىمەن ەكىنشى مارتە الاش بالاسى ۆەل باركەر كۋبوگىن يەلەندى!
ء«بىزدىڭ الىمحانمەن ءسوز تالاستىراتىن ورىستان دا ۇل تۋىپتى-اۋ» دەمەكشى, سوڭعى كەزدەرى وزبەك بوكسشىلارى دا وليمپيادانىڭ اقتىق سىنىندا ونەر كورسەتىپ ءجۇر. اسىرەسە 2016 جىلى ريودا وزبەك بوكسشىلارىنىڭ مەرەيى ۇستەم بولدى. بىراق ءبىزدىڭ سالماقتا ەمەس!..
دانيار جىلدامدىعىنىڭ ارقاسىندا جەڭىسكە جەتتى. شاحرام گياسوۆ ىشقىنا ۇمتىلعانىمەن, سوققىسىن دارىتا الماي ءجۇر. كەرىسىنشە ءبىزدىڭ بوكسشى قارسىلاسىنا ءدال سوققىمەن جاۋاپ بەرەدى. بىرەسە وڭ جاعىنان, بىرەسە سول جاعىنان سىتىلىپ شىعا كەلەدى. ءبىر قاراعاندا گياسوۆ ءجيى شابۋىلداعانداي بولعانىمەن, ءدوپ تيگەن سوققىسى سيرەك. دانياردىڭ شاپشاڭدىعىنان شاحرامنىڭ سىلىكپەسىن شىعىپ, اشۋ-ىزاعا بوي الدىردى. ءسويتىپ جەڭىلىسكە ۇشىرادى. جەڭىس ەلەۋسىنوۆتىڭ ەنشىسىندە!
ءتورت وليمپيادا, ءتورت التىن! الەمدە «قازاقتىڭ سالماعى» اتالىپ كەتكەن 69 كيلودا جەڭىمپازدار ءداستۇرى توكيودا – بەسىنشى وليمپيادادا جالعاسىن تابا ما؟ ارينە ابىلايحان ءجۇسىپوۆ ليتسەنزيانى جەڭىپ الدى. جاۋاپكەرشىلىكتى ارقالاي الا ما؟ قازىر كاسىبي رينگتە اتوي سالىپ جۇرگەن سادريددين احمەدوۆتى قۇراما باپكەرلەرى اۋەسقوي بوكسپەن ەرتە قوشتاستىرعان جوق پا؟ اسلانبەك شىمبەرگەنوۆتىڭ دە شامىرقانىپ تۇرعان شاعى ەمەس پە؟ تاڭداۋ كىمگە تۇسەدى؟ باپكەرلەر بۇرا تارتىپ, «قازاق سالماعىنىڭ» كيەسىنە ۇشىراپ جۇرمەسە ەكەن...