تىلالعىش كومەكشى
Apple كومپانياسىنىڭ Siri نەمەسە Android تەكتەس سمارتفونىڭىزداعى «ياندەكستىڭ» Alisa اتتى كومەكشىلەرى وسى جاساندى ينتەللەكت نەگىزىندە قىزمەتتەرىن جۇزەگە اسىرادى. تولىققاندى بولماسا دا, اتالعان باعدارلامالار گادجەت يەسىمەن اڭگىمەلەسىپ, كەيبىر اۋىزشا بەرگەن بۇيرىقتارىڭىزدى ورىنداپ بەرەدى. اۋا رايىن سۇراي سالاسىز, سمارتفونىڭىزداعى ۇيقىاشارىڭىزدىڭ ۋاقىتىن قويدىرا الاسىز دەگەندەي ءوتىنىشتەردى جەردە قالدىرمايدى.
جاقىندا جاڭالىقتاردان ءبىر باعدارلاماشى جىگىت قولى بوس ەمەس كەزدە قالىڭدىعىمەن سويلەسەتىن بوت جاساپ شىعارعانىن قۇلاعىمىز شالدى. بىلاي قاراساڭىز, ءتيىمدى سياقتى. قۇدا دا تىنىش, قۇداعي دا تىنىش دەگەنگە كەلەدى. ال بىراق بۇل ءونىم تولىعىمەن ادامدى الماستىرا المايتىنى, سەزىمگە بەرىلە المايتىنى جانە سول ارقىلى ءسىزدىڭ قۋانىشىڭىز بەن قايعى-مۇڭىڭىزدى بولىسە المايتىنى تۇسىنىكتى. بىراق قاراپايىم تەحنيكالىق تۇرعىداعى جۇمىستاردى ورىنداي الاتىن بولسا, ونىڭ پايداسى شاش-ەتەكتەن سياقتى. ەسىك الدىنداعى اۋلاڭىزدى سىپىرىپ قويسا, بالاڭىزدى ويناتسا, ءۇيىڭىزدى جينايتىن بولسا, ءسىز قۋانباعاندا كىم قۋانادى؟ ونسىز دا جۇمىستان شارشاپ, كەشكە ۇيىنە جىعىلىپ-ءسۇرىنىپ جەتەتىن ادامعا وسىنداي كومەكشىسى بولعان دەگەن ءبىر كەرەمەت ەمەس پە؟
ادامنان دا اقىلدى
ادامدارمەن شاحمات ويناپ, ءتىپتى الەم چەمپيوندارىن جەڭىپ كەتەتىن روبوتتاردى بۇرىندارى كوردىك. گارري كاسپاروۆ 1997 جىلى قارىمتا ماتچتا «ديپ بليۋ» اتتى سۋپەركومپيۋتەردەن 3,5:2,5 ەسەبىمەن جەڭىلىپ قالسا, 2006 جىلى تاعى ءبىر شاحماتتان الەمدىك ءتاجدى كيگەن ۆلاديمير كرامنيك «ديپ فريتس» اتتى ماشينادان 4:2 ەسەبىمەن تىزە بۇككەن.
ەندى رۋبيكتىڭ كۋبيگىن 20 رەت قانا بۇراپ جيناي سالاتىن نەيروجۇيە ءوزىنىڭ ادامنان الدەقايدا اقىلدى ەكەنىن دالەلدەپ وتىر. ادامدار اراسىنان سۋىرىلىپ شىققان مىقتىنىڭ ءوزى كۋبيكتى 50 رەت اينالدىرادى ەكەن. كاليفورنيا ۋنيۆەرسيتەتىنىڭ عالىمدارى ادام لوگيكاسى قينالىپ بارىپ ءارى ۋاقىت جوعالتا وتىرىپ شەشەتىن ەسەپتى ءاپ-ساتتە ورىنداي سالاتىن وسىنداي روبوت جاساپ شىعارعان.
ساياسي ويىندار
اقش پەن ۇلىبريتانيا سياقتى دەرجاۆالىق ەلدەردە قالىپتاسقان جۇيە بويىنشا بيلىكتە الما-كەزەك ەكى پارتيا اۋىسىپ وتىرادى. ەرتەڭ سولار اسا داۋلى ءبىر ساياسي نەمەسە اسكەري ماسەلەدە كەلىسە الماي, جەمە-جەمگە كەلگەندە ءبىر-بىرىنە سەنبەي, ارااعايىندىق جاساسىن دەپ تىزگىندى وسى جاساندى ينتەللەكتكە سەنىپ تاپسىراتىن كۇن تۋماي ما ەكەن؟ البەتتە, ءسىز جوق دەرسىز. بىراق قازىرگى تەحنولوگيانىڭ جىلدام دامىعان زامانىندا وعان دا ەرتە جەتىپ قالۋىمىز بەك مۇمكىن. قولىنا مەملەكەتتىڭ تىزگىنى تيگەن جاساندى ينتەللەكتىڭىز وزىنشە شەشىم شىعارىپ, ادامعا باعىنباي كەتسە جاعداي قالاي بولار ەكەن؟ سوندا يلون ماسكتىڭ ايتقانىنداي, جاساندى ينتەللەكت وبرازىنداعى «جاۋىڭىز» سولتۇستىك كورەيادان دا قاۋىپتى دەگەنىن كەش تۇسىنەتىن جاعداي تۋىپ قالماس پا ەكەن؟
بۇلاي پايىم جاساۋىمىزدىڭ سەبەبى – جوعارىدا ايتىلعان دۇنيەلەردى ءبىراز جىلدار بۇرىن روبوتتار اتقارادى دەسە ەشقاشان مۇمكىن ەمەستەي كورىنەتىن. ال قازىر وعان تىپتەن تاڭعالمايتىن بولدىق. سونداي تەندەنتسيامەن كەتە بەرسەك, ساياسي ويىندار شەشىمىن دە ادامزات ءۇشىن جاساندى ينتەللەكت شىعارىپ بەرە سالۋى ىقتيمال عوي. جاساندى ينتەللەكتكە جۇگىنۋگە ادامزاتتى ءماجبۇرلەيتىن تاعى ءبىر فاكتور – ول بەيتاراپ بولادى-مىس دەگەن ويلاردىڭ ايتىلۋى.
قۇدايمەن باسەكە
جاساندى ينتەللەكت جاساۋشىلاردىڭ تۇپكى ماقساتى ادام ينتەللەكتىسىن الماستىرا الاتىن دۇنيە جاساۋ ەكەندىگى بەلگىلى. ال ونىڭ ار جاعىندا قۇدايدىڭ ورنىندا ادام جاساۋعا ۇمتىلىس دەگەن ءسوز. ءتۇپتىڭ تۇبىندە ادامنىڭ تۇبىنە جەتەتىن وسى جاساندى اقىل-وي بولماسا يگى.