اقتوبە ايماعىندا ناۋرىز مەرەكەسىن تويلاۋ مەن اتاپ ءوتۋ مەرزىمى تۇتاس ءبىر ايعا سوزىلماق. بۇل كەز 14 ناۋرىز بەن 14 ءساۋىر ارالىعىنا تۇسپا-تۇس كەلەدى.
سونىڭ ىشىندە شوقتىعى بيىك سانالۋان ءىس-شارالار وڭىردە وتكەن 22-ناۋرىز كۇنى وتكىزىلدى. ونىڭ قاي-قايسىسىنا دا ءبىرىنشى كەزەكتە الەۋمەتتىك سيپات پەن باسىمدىق بەرىلگەنى اقتوبەدەگى ناۋرىز تويىنىڭ اجارىن اشا ءتۇستى. ۇلتتىق ناقىشتار مەن ەجەلگى سالت-داستۇرلەرىمىزگە ساي ورنەكتەلىپ جاساقتالعان كيىز ۇيلەردىڭ ارقايسىسى وبلىستا بيىلعى جىلى جۇزەگە اساتىن الەۋمەتتىك جوبالاردىڭ اتاۋلارىن الدى. ايتالىق بيىل وبلىستا «انالارعا تاعزىم» الەۋمەتتىك جوباسى قولعا الىندى.
سونداي وڭىردە 2018 جىل –بالالار جىلى دەپ بەلگىلەندى. مىنە, ءمانى مەن ءسانى كەلىسكەن كيىز ۇيلەر اتاۋلارى وسىنداي باعىتپەن جالعاسا بەرەدى. تويلاۋ مەن ويلاۋ جانە ءتۇر مەن مازمۇن ءبىر-بىرىمەن تىعىز ۇيلەسىم تابۋى دا ۇلىستىڭ ۇلى كۇنىنە ءتان قۇندىلىقتاردى بايىتا ءتۇستى. سونداي-اق ناۋرىز مەيرامى قۇرمەتىنە وراي وبلىس اۋماعىندا جيىرما الەۋمەتتىك نىسان پايدالانۋعا بەرىلگەنى دە باستى ارتىقشىلىق پەن وزگەشەلىكتىڭ ءبىرى.
نەگىزگى شارا قر پرەزيدەنتى اتىنداعى ساياباق اۋدانىندا, ياعني ابىلقايىر حان داڭعىلىنىڭ بويىندا مارەگە جەتتى. مۇندا «ناۋرىزىم –قۇت –بەرەكە!» اتتى مەرەكەلىك دۋمان مەن تەاترلاندىرىلعان جانە گالا-كونتسەرتتەر قويىلىپ, ءوڭىر تۇرعىندارىن اقتوبە وبلىسىنىڭ اكىمى بەردىبەك ساپارباەۆ جاڭعىرۋ مەرەكەسىمەن قۇتتىقتاپ ءسوز سويلەدى.
وسىجەردە ۇزىندىعى ءبىر كيلومەترگە جۋىق پاۆيلوندار قاتارى ورنالاستىرىلىپ, اقتوبەلىكتەر وعان تەگىن قويىلعان 10 توننا باۋىرساق پەن 13 مىڭ ليتر ناۋرىز كوجەدەن ءدام اۋىز ءتيدى. وسى ورايدا قوسىپ, ايتا كەتەرلىك ماسەلە اقتوبە ايماعىندا ورنىققان تاعى ءبىر قۇپتاۋعا تۇرارلىق ءۇردىس بار. ناۋرىز كۇنى وبلىس ورتالىعىنداعى مەيرامحانا-كافەلەر مەن اسحانالار جۇيەسىندە جانە بارلىق قوعامدىق تاماقتاندىرۋ ورىندارىندا وعان كەلگەن كليەنتتەرگە باۋىرساق پەن ناۋرىز كوجە تەگىن ۇسىنىلادى.
جوعارىدا اتالىپ وتكەندەي اقتوبە ايماعىنداعى ناۋرىز رۋحىن تۋ ەتكەن شارالار تەك ءبىر كۇننىڭ اياسىمەن شەكتەلمەيدى. بۇلاردىڭ دەنى ءبىرىنشى كەزەكتە الەۋمەتتىك جاعىنان از قامتىلعان ازاماتتار مەن بالالاردى, سونىمەن بىرگە كوپ بالالى انالار مەن سوعىس جانە ەڭبەك ارداگەرلەرىن مورالدىق جانە ماتەريالدىق تۇرعىدان قولداۋعا باعىتتالىپ وتىر.
تەمىر قۇسايىن,
"ەگەمەن قازاقستان"