ماۋلەن اشىمباەۆ رەسپۋبليكالىق رەفەرەندۋمنىڭ تاريحي مانىنە توقتالىپ, ءار داۋىستىڭ ماڭىزدى ەكەنىن جانە ول جوعارى ازاماتتىق جاۋاپكەرشىلىكتىڭ ايقىن كورىنىسى سانالاتىنىن اتاپ ءوتتى.
«بۇگىن ەگەمەن ەلىمىز ءۇشىن ماڭىزدى كۇن. قازاقستاننىڭ جاڭا كونستيتۋتسياسى جالپىۇلتتىق رەفەرەندۋمعا شىعارىلىپ وتىر. بۇل رەتتە ازاماتتىق بەلسەندىلىك ايرىقشا مانگە يە. سەبەبى, مەملەكەتتىك بيلىكتىڭ بىردەن-ءبىر باستاۋى – حالىق. سوندىقتان رەفەرەندۋمعا قاتىسىپ, داۋىس بەرۋ – ءار قازاقستاندىق ءۇشىن ءوز قۇقىعىن جۇزەگە اسىرىپ, ەلدىڭ ستراتەگيالىق دامۋ باعدارىن ايقىنداۋعا ۇلەس قوساتىن ۇلكەن مۇمكىندىك. سونداي-اق بۇل رەفەرەندۋم – پرەزيدەنتىمىز قاسىم-جومارت كەمەل ۇلى توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ ءىس جۇزىندەگى جارقىن كورىنىسى. ياعني, مەملەكەتتىك ماڭىزعا يە شەشىمدەر حالىقتىڭ پىكىرى ەسكەرىلە وتىرىپ قابىلدانادى. وسىعان وراي بارلىق ازاماتتى ەل ەرتەڭىنە بەي-جاي قاراماي, رەفەرەندۋمعا بەلسەندى قاتىسىپ, مەملەكەتتىڭ ۇزاقمەرزىمدى دامۋىن كوزدەيتىن ماسەلەگە بايلانىستى ءوز تاڭداۋلارىن جاساۋعا شاقىرامىز. مۇنداي ماڭىزدى كەزەڭدە ءار داۋىس ۇلكەن ءرول اتقارادى جانە ول – جوعارى ازاماتتىق جاۋاپكەرشىلىكتىڭ بەلگىسى», – دەدى ماۋلەن اشىمباەۆ.
