سۋرەت «ەگەمەن قازاقستاننىڭ» ارحيۆىنەن الىندى
پرەزيدەنت الەمدىك ىنتىماقتاستىقتى نىعايتۋعا سەپتەسەتىن ۇسىنىستى وسىدان 6 جىل بۇرىن بۇۇ-نىڭ 75-سەسسياسىندا جالپى ساياسي پىكىرتالاس بارىسىندا كوتەردى. ادامگەرشىلىك قۇندىلىقتاردى دارىپتەيتىن قۇجاتتىڭ تەڭ اۆتورلىعىنا باس-اياعى 54 مەملەكەت تە قوسىلدى.
قاسىم-جومارت توقاەۆ ۆولونتەرلىك قىزمەتتى ادىلەتتى قازاقستاندى قۇرۋدىڭ ماڭىزدى تىرەگى دەپ سانايدى. مەملەكەت باسشىسى «ەرىكتىلەر – ادامگەرشىلىك قۇندىلىقتاردى تۋ ەتكەن, مەملەكەت پەن قوعام اراسىنداعى سەنىمدى سەرىكتەستىكتى نىعايتاتىن شىنايى پاتريوتتار. جانقيارلىق پەن مەيىرىمدىلىك – قازاق حالقىنا ءتان قاسيەت, وسى قۇندىلىقتاردى جاس ۇرپاقتىڭ بويىنا ءسىڭىرۋ ماڭىزدى», دەپ ۇنەمى ايتىپ كەلەدى.
حالىقارالىق جىل اياسىندا بىلتىر ەلىمىزدە العاشقى جارتىجىلدىقتا ۆولونتەرلەردىڭ قاتىسۋىمەن 27 مىڭنان اسا ءىس-شارا ۇيىمداستىرىلدى. «يگى ىستەر مارافونى» جوباسى دا قوعام تاراپىنان كەڭ قولداۋ تاپتى. وتانداستارىمىز الەۋمەتتىك, ەكولوگيالىق جانە مادەني باعىتتاردى قامتىعان 9 مىڭنان اسا يگى ءىس اتقارىپ, جوباعا 40 مىڭ ازامات قاتىستى.
سونىمەن قاتار مەملەكەت باسشىسىنىڭ باستاماسىمەن تمد ۇكىمەت باسشىلارى كەڭەسىنىڭ شەشىمى بويىنشا جىل سايىنعى دوستاستىق ەلدەرى ۆولونتەرلەرىنىڭ فورۋمى ۇيىمداستىرىلاتىن بولدى. وعان ساي ەرەجە ازىرلەنىپ, ونىڭ نەگىزىندە جىل سايىنعى ۆولونتەرلەر فورۋمى قۇرىلدى. العاشقى فورۋم بيىل استانا قالاسىندا وتەدى.
بۇعان قوسا رەسپۋبليكانىڭ ءتۇرلى ايماقتارىندا 10 ماقساتتى توپتىڭ كەزدەسۋى ءوتتى. تولىق قارجىلاندىرۋ باعدارلاماسى اياسىندا 2025 جىلى كەنيا, تۇركيا جانە تايلاند ەلدەرىنە 7 قازاقستاندىق ۆولونتەر بارىپ, كۇنى بۇگىندە ءوز جۇمىسىن ابىرويمەن اتقارىپ جاتىر.
ۆولونتەرلەر قارتتار جانە بالالار ۇيلەرىندە كومەك كورسەتىپ, قۇتقارۋ جۇمىستارىنان باستاپ وقىتۋ جوبالارىنا دەيىن ءتۇرلى سالادا بەلسەندىلىك تانىتىپ ءجۇر. ەسەسىنە 2025 جىلى ەلدەگى ۆولونتەرلەر سانى 300 مىڭعا جۋىقتادى. ولاردىڭ قاتارىندا 6 مىڭ «كۇمىس» ۆولونتەر جانە 810-نان اسا ۆولونتەرلىك ۇيىم بار.
جالپى, ەل اۋماعىندا ۆولونتەرلىك باستامالار قاتارى كوبەيدى. جاقسىلىق جاساۋعا ۇمتىلعان, قوعامعا پايداسىن تيگىزۋدى ماقسات ەتكەن بەلسەندى ازاماتتار دا جىل ساناپ ارتىپ كەلەدى. ەل كولەمىندە ۇلتتىق فرونت-كەڭسە مەن 20 وڭىرلىك فرونت-كەڭسە جۇمىس ىستەيدى, بىرىڭعاي Call-ورتالىق قىزمەت كورسەتەدى جانە Qazvolunteer.kz ۇلتتىق ونلاين-پلاتفورماسى ىسكە قوسىلعان. وسىنداي جۇيەلى جۇمىستىڭ ارقاسىندا بىلتىر 56 ۆولونتەرلىك جوبا ىسكە اسىرىلىپ, جەرگىلىكتى باستامالاردى دامىتۋ ءۇشىن 60 شاعىن گرانت ءبولىندى. وسى جىلى دا قازاقستان ۆولونتەرلىك قوزعالىستىڭ نەگىزىن نىعايتۋدى جالعاستىرا بەرەدى.
