وتىرىستا باتىس قازاقستان وبلىسىنىڭ پروكۋراتۋراسى قىلمىستىق قاۋىپتەردى انىقتاۋ جانە ازايتۋعا باعىتتالعان «قاۋىپسىز ءوڭىر» جوباسىن تانىستىردى. جوبا قاۋىپتى ۋچاسكەلەردى اباتتاندىرۋ, كوشەلەردى جارىقتاندىرۋ, ينفراقۇرىلىمدى مونيتورينگتەۋ, سونداي-اق قۇقىق بۇزۋشىلىقتار تۋرالى دەرەكتەردى تالداۋ ارقىلى پروفيلاكتيكالىق جانە پاترۋلدىك جۇمىستى كۇشەيتۋدى كوزدەيدى.
ۇسىنىلعان دەرەكتەرگە سايكەس, جوبا اياسىندا بىرقاتار تاۋەكەلدەر تومەندەتىلىپ, بالالاردىڭ مەكتەپكە باراتىن جولدارىندا ينفراقۇرىلىمدىق ماسەلەلەر شەشىلگەن. سونىمەن قاتار بۋللينگكە قاتىستى فاكتىلەر انىقتالىپ, ءتيىستى شارالار قابىلدانعان.
اتالعان جۇمىس مەملەكەت باسشىسى قاسىم-جومارت توقاەۆ بالالاردىڭ قۇقىعىن قورعاۋ مەن قاۋىپسىز ورتا قالىپتاستىرۋ مەملەكەتتىڭ باسىم باعىتى ەكەنىن اتاپ وتكەن ۇستانىمدارىمەن ساباقتاس ەكەنى ايتىلدى.
القا وتىرىسىنىڭ قورىتىندىسى بويىنشا بارلىق ءوڭىر پروكۋرورلارىنا بالالار قاۋىپسىزدىگى ماسەلەلەرىنە ەرەكشە نازار اۋدارۋ تاپسىرىلدى. قاۋىپتى اۋماقتاردى انىقتاۋ, جارىقتاندىرۋ مەن پاترۋلدەۋدى كۇشەيتۋ, جەرگىلىكتى اتقارۋشى ورگاندارمەن جانە پوليتسيامەن ءوزارا ءىس-قيمىلدى ناقتىلاۋ الداعى كەزەڭدەگى نەگىزگى مىندەتتەر رەتىندە بەلگىلەندى.
سونىمەن قاتار الماتى وبلىسىنىڭ پروكۋراتۋراسى Kundelik پلاتفورماسىمەن مەموراندۋم جاساپ, قوسىمشانىڭ باستى بەتىندە پروكۋراتۋرا بلوگىن ىسكە قوسقانى ايتىلدى. بۇل بلوگ بالالاردىڭ قۇقىقتىق مادەنيەتىن ارتتىرۋعا جانە قاۋىپسىزدىگىن قامتاماسىز ەتۋگە باعىتتالعان.
بلوگ اياسىندا فوتو, ۆيدەو, ماتىندىك ماتەريالدار مەن ۆەبينارلار وقۋشىلاردىڭ جاس ەرەكشەلىكتەرىنە ساي دايىندالىپ, قۇقىقتىق تاقىرىپتار تۇسىنىكتى تىلدە ۇسىنىلادى. كەرى بايلانىس QR-كودتار مەن مەسسەندجەرلەر ارقىلى ءانونيمدى تۇردە جۇزەگە اسادى. رەسمي مالىمەتكە سايكەس, بلوگ ماتەريالدارىن 210 مىڭعا جۋىق وقۋشى مەن اتا-انا كورگەن.
پلاتفورمامەن ىنتىماقتاستىق قۇقىقتىق اقپارات تاراتۋمەن قاتار, قولدا بار دەرەكتەردى تالداۋعا مۇمكىندىك بەرگەن. بۇل مالىمەتتەر «باقىتتى جانە قاۋىپسىز بالالىق شاق» جوباسى شەڭبەرىندە پايدالانىلىپ, تاۋەكەل توبىنداعى بالالار مەن اتا-انالاردى ەرتەرەك انىقتاۋعا جاعداي جاساعان.
حابارلامادا اتقارىلعان جۇمىستار ناتيجەسىندە 16 مىڭنان استام بالانىڭ مەديتسينالىق قىزمەتتەرمەن قامتىلعانى, 4 مىڭنان استام اتا-اناعا زاڭدا كوزدەلگەن الەۋمەتتىك تولەمدەر بەرىلگەنى ايتىلدى. سونداي-اق قامقورلىقسىز قالعان ءۇش جاسار بالاعا جەدەل كومەك كورسەتىلگەنى كەلتىرىلگەن مىسالداردىڭ ءبىرى رەتىندە كورسەتىلدى.
باس پروكۋراتۋرا مالىمەتىنشە, بۇل اتقارىلعان جۇمىستىڭ ءبىر بولىگى عانا. الداعى ۋاقىتتا بالالاردىڭ قۇقىقتارىن قورعاۋ جونىندەگى پروكۋرورلار قىزمەتىن جۇيەلەۋ جانە اقپاراتتاندىرۋ تيىمدىلىگىن ارتتىرۋ ماقساتىندا Kundelik پلاتفورماسىمەن وسىنداي ينتەگراتسيانى وزگە وڭىرلەردە دە ەنگىزۋ جوسپارلانىپ وتىر.
