فوتو: ءىىم
ەل نامىسىن قورعاعان زامانبەك دانابەكوۆ (65 كەلى) قولا جۇلدەمەن ورالدى. ول الجير, فرانتسيا, تاجىكستان ەلدەرىنىڭ سپورتشىلارىن ۇتتى.
زامانبەك قازىمبەك ۇلى بالا كەزىنەن سپورتتى سەرىك ەتكەن. ونىڭ امبەبەپ جەكپە-جەككە العاشقى قاتىسۋى ەكەن. 1 ايعا جۋىق دايىندالىپتى. ەندىگى ماقساتى – الەم چەمپيونى اتانۋ.
ز.دانابەكوۆ – اقتوبە وبلىسى پوليتسيا دەپارتامەنتىنىڭ جەدەل قيمىلدايتىن ارنايى جاساعىنىڭ جاۋىنگەرى. ول بوكستان, قويان-قولتىق ۇرىستان رەسپۋبليكالىق, الەمدىك تۋرنيرلەردىڭ بىرنەشە دۇركىن جۇلدەگەرى, بوكستان سپورت شەبەرى.
«سپورتتىق جولىم 9 جاسىمدا باستالدى. ارنايى جاساقتا سپورتقا جوعارى دەن قويىلاتىندىقتان, 2022 جىلى وسى سالاعا بەت بۇردىم. ارنايى جاساق قاتارىندا ەلىمنىڭ تىنىشتىعىن كۇزەتىپ قانا قويماي, مۇندا بىرنەشە دۇركىن الەم چەمپيوندارىمەن, ناعىز كاسىبي سپورتشىلارمەن بىرگە قىزمەت ەتۋ مەن جاتتىعۋ – مەن ءۇشىن ۇلكەن مارتەبە عانا ەمەس, ناعىز كاسىبي مەكتەپ», دەيدى سپورتشى-پوليتسەي.
